ലണ്ടന്‍: ഏപ്രില്‍ ആറു മുതല്‍ ബ്രിട്ടനിലെ ഏകദേശം മൂന്നു ലക്ഷത്തോളം വരുന്ന, വര്‍ക്ക് ഫ്രം ഹോം ചെയ്യുന്നവര്‍ക്ക് അവരുടെ വാര്‍ഷിക ഹോം വര്‍ക്കിംഗ് അലവന്‍സ് ഇല്ലാതെയാവും. വീട്ടിലിരുന്ന് ജോലി ചെയ്യുന്നവര്‍ക്കുള്ള ഈ ആനുകൂല്യം ഇല്ലാതെയാക്കുക വഴി 2026 ഏപ്രില്‍ മുതല്‍ അഞ്ച് വര്‍ഷക്കാലത്തില്‍ 115 മില്യണ്‍ പൗണ്ട് ലാഭിക്കാന്‍ കഴിയുമെന്നാണ് എച്ച് എം ആര്‍ സി കണക്കാക്കുന്നതെന്ന് അക്കൗണ്ടന്‍സി, ബിസിനസ് അഡൈ്വസറി സ്ഥാപനമായ അസെറ്റ്‌സ് നടത്തിയ പഠനത്തിന്റെ റിപ്പോര്‍ട്ടില്‍ പറയുന്നു.
വീട്ടിലിരുന്ന് ജോലി ചെയ്യുമ്പോള്‍ ഉണ്ടാകുന്ന, തൊഴിലുടമകള്‍ തിരിച്ചു നല്‍കാത്ത ചെലവുകള്‍ക്ക് മീതെ ലഭിച്ചിരുന്ന നികുതി ഇളവ് ഇല്ലാതെയാകുന്നതോടെ പലര്‍ക്കും അത് ഒരു ഇരുട്ടടിയായി മാറും. വീട്ടിലിരുന്ന് ജോലി ചെയ്യുമ്പോള്‍ ഉണ്ടാകുന്ന ഹീറ്റിംഗ്, ഇലക്ട്രിസിറ്റി, ബിസിനസ് ഫോണ്‍ കോളുകള്‍ എന്നിവയിലെ അധിക ചെലവുകള്‍ക്ക് ഒരു ആശ്വാസമായിരുന്നു നികുതിയിളവ്. ഇതിന് അര്‍ഹതയുള്ളവര്‍ക്ക് പ്രതിവാരം ആറു പൗണ്ടാണ് ഇളവായി ഇപ്പോള്‍ ലഭിച്ചുകൊണ്ടിരിക്കുന്നത്. ഇതിനായി ഏതെങ്കിലും വിധത്തിലുള്ള രസീതുകള്‍ ഹാജരാക്കേണ്ടതില്ല.
