യുകെയിലെ വിവിധ നഗരങ്ങളില്‍ പാര്‍ക്കിങ് മെഷീനുകള്‍ കേന്ദ്രീകരിച്ചുള്ള സൈബര്‍ തട്ടിപ്പ് വ്യാപകമാകുന്നു. 'ക്വിഷിങ്' എന്നറിയപ്പെടുന്ന ഈ തട്ടിപ്പിലൂടെ വാഹന ഉടമകളുടെ ബാങ്ക് വിവരങ്ങള്‍ ചോര്‍ത്തുന്നതായാണ് റിപ്പോര്‍ട്ടുകള്‍. പാര്‍ക്കിങ് ഫീസിനായി മെഷീനുകളില്‍ പതിപ്പിച്ചിട്ടുള്ള ഔദ്യോഗിക ക്യുആര്‍ കോഡുകള്‍ക്ക് മുകളില്‍ തട്ടിപ്പുകാര്‍ വ്യാജ സ്റ്റിക്കറുകള്‍ ഒട്ടിച്ചാണ് ഇരകളെ കുടുക്കുന്നത്. ലണ്ടന്‍, പോര്‍ട്‌സ്മൗത്ത്, ബോണ്‍മൗത്ത്, ബെല്‍ഫാസ്റ്റ്, നോട്ടിംഗ്ഹാംഷെയര്‍ തുടങ്ങിയ നഗരങ്ങളില്‍ ഇത്തരം സംഭവങ്ങള്‍ വര്‍ധിച്ചതോടെ പൊലീസ് ജാഗ്രതാ നിര്‍ദ്ദേശം നല്‍കി. വ്യാജ ക്യുആര്‍ കോഡ് സ്‌കാന്‍ ചെയ്താല്‍ ഉപയോക്താവ് പാര്‍ക്കിങ് കമ്പനികളുടെ വെബ്‌സൈറ്റുകളോട് സാമ്യമുള്ള വ്യാജ സൈറ്റുകളിലേക്കാണ് എത്തുന്നത്. കാര്‍ഡ് വിവരങ്ങള്‍ നല്‍കുന്നതോടെ അവ തട്ടിപ്പുകാരുടെ കൈവശമാകും. ചിലയിടങ്ങളില്‍ 'പെനാല്‍റ്റി ഒഴിവാക്കാന്‍ ഉടന്‍ പണമടയ്ക്കുക' എന്ന സന്ദേശം നല്‍കി ആളുകളെ ഭയപ്പെടുത്തി വേഗത്തില്‍ സ്‌കാന്‍ ചെയ്യിക്കുന്ന രീതിയും കണ്ടെത്തിയിട്ടുണ്ട്.
നാഷണല്‍ സൈബര്‍ സെക്യൂരിറ്റി സെന്ററും പ്രാദേശിക കൗണ്‍സിലുകളും പൊതുജനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്. പാര്‍ക്കിങ് മെഷീനുകളില്‍ കാണുന്ന ക്യുആര്‍ കോഡുകള്‍ സ്‌കാന്‍ ചെയ്യാതിരിക്കുന്നതാണ് ഏറ്റവും സുരക്ഷിതം. സംശയം തോന്നിയാല്‍ ആ കോഡ് സ്‌കാന്‍ ചെയ്യരുതെന്നും, പണമടയ്ക്കുന്നതിനായി PayByPhone പോലുള്ള ഔദ്യോഗിക ആപ്പുകള്‍ നേരിട്ട് പ്ലേസ്റ്റോറിലോ ആപ്പ് സ്റ്റോറിലോ നിന്ന് ഡൗണ്‍ലോഡ് ചെയ്ത് ഉപയോഗിക്കണമെന്നും നിര്‍ദേശിക്കുന്നു. വ്യാജ കോഡ് സ്‌കാന്‍ ചെയ്ത് ബാങ്ക് വിവരങ്ങള്‍ നല്‍കിയാല്‍ ഉടന്‍ ബാങ്ക് ആപ്പ് വഴി കാര്‍ഡ് ബ്ലോക്ക് ചെയ്യുകയും ബാങ്കുമായി ബന്ധപ്പെട്ട് വിവരം അറിയിക്കുകയും വേണം.
അതോടൊപ്പം നാഷണല്‍ സൈബര്‍ സെക്യൂരിറ്റി സെന്ററിലോ ആക്ഷന്‍ ഫ്രോഡിലോ വിവരം നല്‍കണമെന്നും അധികൃതര്‍ ആവശ്യപ്പെട്ടു. ഡോര്‍സെറ്റ് കൗണ്‍സില്‍ ഉള്‍പ്പെടെയുള്ള ചില പ്രാദേശിക ഭരണകൂടങ്ങള്‍ തങ്ങളുടെ പാര്‍ക്കിങ് മെഷീനുകളില്‍ ക്യുആര്‍ കോഡുകള്‍ ഉപയോഗിക്കുന്നേയില്ലെന്ന് വ്യക്തമാക്കിയിട്ടുണ്ട്. അതിനാല്‍ ഇത്തരം ഇടങ്ങളില്‍ കാണുന്ന എല്ലാ ക്യുആര്‍ കോഡുകളും വ്യാജമാണെന്ന് ഉറപ്പിക്കാം. യുകെയില്‍ മാത്രമല്ല, ന്യൂയോര്‍ക്ക് പോലുള്ള രാജ്യാന്തര നഗരങ്ങളിലും സമാനമായ തട്ടിപ്പുകള്‍ റിപ്പോര്‍ട്ട് ചെയ്തിട്ടുണ്ട്. പാര്‍ക്കിങ് മെഷീനുകള്‍ ഉപയോഗിക്കുമ്പോള്‍ അതീവ ശ്രദ്ധ പുലര്‍ത്തണമെന്നും സംശയാസ്പദമായ സാഹചര്യങ്ങള്‍ ശ്രദ്ധയില്‍പ്പെട്ടാല്‍ പൊലീസിനെ അറിയിക്കണമെന്നും അധികൃതര്‍ മുന്നറിയിപ്പ് നല്‍കി.
