ഇറാന് -യുഎസ് സംഘര്ഷത്തെ തുടര്ന്ന് ഉയര്ന്ന ഭവന വായ്പാ പലിശ നിരക്ക് കുറയുന്നതായി റിപ്പോര്ട്ട്. പ്രധാന മോര്ട്ട്ഗേജ് ലെന്ഡര്മാര് പുതിയ ഡീലുകളില് ഗണ്യമായ നിരക്കിളവ് പ്രഖ്യാപിച്ചതോടെ ആദ്യമായി വീട് സ്വന്തമാക്കാന് ശ്രമിക്കുന്നവര്ക്ക് ആശ്വാസമാവുകയാണ്. യുദ്ധത്തില് ദീര്ഘകാല സമാധാന സാധ്യത ഉയര്ന്നതോടെ വിപണിയിലും പ്രതിഫലനമുണ്ട്. എന്നാല് സ്ഥിതി അനിശ്ചിതത്വത്തിലായതിനാല് പ്രവണതയും പെട്ടെന്ന് മാറാം.
പലിശ കഴിഞ്ഞ ആറാഴ്ചയായി ഉയര്ന്നത് വായ്പ തേടുന്നവര്ക്കും ആദ്യ വീട് വാങ്ങുന്നവര്ക്കും സമ്മര്ദ്ദമുണ്ടാക്കിയിരിക്കുന്നു. യുദ്ധം അവസാനിക്കാത്തതിനാല് സ്ഥിരതയില്ലാത്ത നിരക്കാണ് വരുന്നത്. ഹാലിഫാക്സ്, എച്ച്എസ്ബിസി, സാന്റാന്ഡര് തുടങ്ങിയ ബാങ്കുകള് സ്ഥിര പലിശ നിരക്ക് കുറച്ചിട്ടുണ്ട്. രണ്ടുവര്ഷത്തെ ഫിക്സഡ് മോര്ട്ട്ഗേജ് നിരക്ക് 5.90 ശതനമാനത്തില് നിന്ന് 5.87 ശതമാനമായി കുറഞ്ഞതും കൂടുതല് ഇടിവ് സാധ്യതയുണ്ടെന്ന് വിലയിരുത്തുന്നു.
യുദ്ധ സാഹചര്യത്തില് അയവ് വരികയും, വെടിനിര്ത്തല് പ്രഖ്യാപിക്കുകയും ചെയ്തിട്ടുണ്ട്. ഒപ്പം ലോകത്തിലെ എണ്ണ വിതരണത്തില് സുപ്രധാനമായ ഹോര്മുസ് കടലിടുക്ക് തുറന്നിടുകയും ചെയ്തിരിക്കുന്നു. ഇന്ധനവിപണിയിലെ ആഘാതം കുറയ്ക്കുന്ന നടപടികളുടെ പ്രതിഫലനം ബ്രിട്ടനിലെ മോര്ട്ട്ഗേജ് വിപണിയിലും എത്തുന്നുവെന്നത് സമാശ്വാസമാണ്.
വീട് സ്വന്തമാക്കാനുള്ള ചെലവ് ഇപ്പോഴും ഉയര്ന്നതിനാല് സാധാരണക്കാര്ക്ക് പ്രതിസന്ധി തുടരുകയാണ്. ഇന്ധന പ്രതിസന്ധിയും ഉര്ന്ന ജീവിത ചെലവും ജനജീവിതത്തെ സാരമായി ബാധിച്ചു കഴിഞ്ഞു. വായ്പ എടുക്കാന് ജനം ഭയപ്പെടുന്ന അവസ്ഥയാണ്.
