ചരിത്ര തീരുമാനവുമായി ചര്‍ച്ച് ഇന്‍ വെയില്‍സ്. സ്വവര്‍ഗ ദമ്പതികളുടെ വിവാഹത്തിന് പള്ളികളില്‍ ഔദ്യോഗികമായി ആശിര്‍വാദം നല്‍കുന്നതിനുള്ള ബില്ലിന് ഭൂരിപക്ഷത്തോടെ അംഗീകാരം നല്‍കി. സഭയുടെ ഭരണസമിതിയില്‍ നടന്ന വോട്ടെടുപ്പില്‍ ഭൂരിഭാഗം അംഗങ്ങളും അനുകൂലമായി വോട്ട് ചെയ്തതോടെയാണ് ചരിത്രപരമായ തീരുമാനം ഉണ്ടായത്. ബിഷപ്പുമാര്‍, വൈദികര്‍, അത്മായര്‍ എന്നിവരടങ്ങുന്ന സഭയുടെ മൂന്ന് വിഭാഗങ്ങളും ബില്ലിനെ പിന്തുണച്ചു. ഇതിലൂടെ സിവില്‍ വിവാഹം കഴിഞ്ഞ സ്വവര്‍ഗ ദമ്പതികള്‍ക്ക് പള്ളിയില്‍ വെച്ച് പ്രാര്‍ത്ഥനകളും ആശിര്‍വാദവും സ്വീകരിക്കാന്‍ സാധിക്കും. എന്നാല്‍ ഈ തീരുമാനം എല്ലാ വൈദികര്‍ക്കും നിര്‍ബന്ധമല്ല. സ്വവര്‍ഗ ദമ്പതികളെ ആശിര്‍വദിക്കാന്‍ താല്‍പര്യമില്ലാത്ത വൈദികര്‍ക്ക് അതില്‍ നിന്ന് മാറിനില്‍ക്കാനുള്ള അനുമതിയും ബില്ലില്‍ ഉറപ്പുനല്‍കുന്നു.
സഭയുടെ പരമ്പരാഗതമായ വിവാഹ സങ്കല്‍പങ്ങളില്‍ മാറ്റം വരുത്താതെ തന്നെ, എല്ലാവരെയും ഉള്‍ക്കൊള്ളുന്ന സമീപനം സ്വീകരിക്കാനാണ് സഭ ഇതിലൂടെ ലക്ഷ്യമിടുന്നത്. ലോകമെമ്പാടുമുള്ള ആംഗ്ലിക്കന്‍ സഭകള്‍ക്കിടയില്‍ ഈ വിഷയം വലിയ ചര്‍ച്ചകള്‍ക്കും അഭിപ്രായ വ്യത്യാസങ്ങള്‍ക്കും വഴിവെക്കുന്നതിനിടയിലാണ് ചര്‍ച്ച് ഇന്‍ വെയ്ല്‍സിന്റെ തീരുമാനം. 148 അംഗങ്ങളുടെ ഗവേണിങ്ങ് ബോഡിയില്‍ മൂന്നില്‍ രണ്ട് ഭൂരിപക്ഷത്തോടെയാണ് ബില്ലിന് അംഗീകാരം ലഭിച്ചത്. 2025 ജൂലൈയില്‍ വെയില്‍സിലെ ആര്‍ച്ച് ബിഷപ്പായി ചെറി വാന്‍ സ്ഥാനമേറ്റതിനു ശേഷമാണ് ഈ തീരുമാനം.
ആ പദവി വഹിക്കുന്ന ആദ്യ വനിതയും ആദ്യത്തെ പരസ്യമായി എല്‍ജിബിടി വ്യക്തിയുമാണ് ചെറി വാന്‍.
