എന്‍എച്ച്എസ് വെയ്റ്റിംഗ് ലിസ്റ്റില്‍ മില്ല്യണിലേറെ രോഗികള്‍ കാത്തിരിക്കുന്നതിനിടെ ഓപ്പറേഷനുകള്‍ക്കു ചെല്ലുന്നവര്‍ക്കും തിരിച്ചടി. പത്തിലൊന്ന് എന്‍എച്ച്എസ് ഓപ്പറേഷനുകള്‍ നടക്കേണ്ട ദിവസമോ, അതിന് തൊട്ടു മുന്‍പുള്ള ദിവസമോ റദ്ദാകുന്നതായാണ് കണ്ടെത്തല്‍. 24 മണിക്കൂര്‍ നോട്ടീസിലാണ് സുപ്രധാന സര്‍ജറികള്‍ മുടങ്ങുന്നത്. ഇത്തരത്തില്‍ റദ്ദാകുന്ന 40% കേസുകളും ഒഴിവാക്കാന്‍ കഴിയുന്നതാണെന്നും റിപ്പോര്‍ട്ടില്‍ പറയുന്നു.
24 മണിക്കൂര്‍ പോലും ബാക്കിയില്ലാത്ത ഘട്ടത്തിലാണ് പത്തിലൊന്ന് കേസുകളില്‍ രോഗികള്‍ തങ്ങളുടെ സര്‍ജറി റദ്ദാകുകയോ, മാറ്റിവെയ്ക്കുകയോ ചെയ്തതായി അറിയുന്നത്. 91 ഇംഗ്ലീഷ് എന്‍എച്ച്എസ് ട്രസ്റ്റുകളിലെ ഇലക്ടീവ് സര്‍ജറികളില്‍ നടത്തിയ അന്വേഷണത്തിലാണ് 10% ഓപ്പറേഷനുകള്‍ പദ്ധതിയിട്ട ദിവസത്തിന് തലേന്ന് റദ്ദാകുന്നതായി കണ്ടെത്തിയത്.
രോഗികള്‍ക്ക് പ്രീ-ഓപ്പറേഷന്‍ അപ്പോയിന്റ്‌മെന്റ് ലഭിക്കുന്ന സമയത്ത് 9% കേസുകള്‍ മാറ്റിവെയ്ക്കുകയും ചെയ്യുന്നു. ഈ കണക്കുകള്‍ ദേശീയ തലത്തില്‍ ആവര്‍ത്തിച്ചിട്ടുണ്ടെങ്കില്‍ ഏകദേശം 300,000 റദ്ദാക്കലും, മാറ്റിവെയ്ക്കലുമാണ് അരങ്ങേറുന്നത്. അതേസമയം 40% റദ്ദാക്കലും ഒഴിവാക്കാന്‍ കഴിയുന്നതാണെന്നും ഗവേഷകര്‍ ചൂണ്ടിക്കാണിച്ചു.
ഫെബ്രുവരി അവസാനം വരെയുള്ള കണക്കുകള്‍ പ്രകാരം ഏകദേശം 6 മില്ല്യണ്‍ രോഗികള്‍ ചികിത്സയ്ക്കായി കാത്തിരിക്കുന്നുണ്ട്. മെഡിക്കല്‍ കാരണങ്ങള്‍, രോഗികള്‍ എത്താതെ പോകല്‍, ഓപ്പറേഷന്‍ ലിസ്റ്റില്‍ ആളുകൂടല്‍, എമര്‍ജന്‍സി അഡ്മിഷന്‍ എന്നിവയാണ് സര്‍ജറി മാറ്റാന്‍ കാരണമാകുന്നത്. ഈ പ്രശ്‌നങ്ങള്‍ 5 ദിവസം മുന്‍പ് വരെ കണ്ടെത്താന്‍ കഴിഞ്ഞാല്‍ ഓപ്പറേഷനുമായി മുന്നോട്ട് പോകുകയോ, സ്ലോട്ട് മറ്റൊരു രോഗിക്ക് നല്‍കുകയോ ചെയ്യാന്‍ സാധിക്കുമെന്ന് റിപ്പോര്‍ട്ട് വ്യക്തമാക്കുന്നു.
