ലോകത്തിലെ ഏറ്റവും സമ്പത്തായ മാനവവിഭവശേഷിയില്‍ ബ്രിട്ടന്‍ വരുംകാലങ്ങളില്‍ ഏറെ പിന്നിലാകുമെന്ന് പഠന റിപ്പോര്‍ട്ട്. രാജ്യത്ത് ഇപ്പോള്‍ ഓരോ ദിവസവും ജനിക്കുന്നവരേക്കാള്‍ കൂടുതലാണ് മരിക്കുന്നവരുടെ എണ്ണം. ഈ നില തുടര്‍ന്നാല്‍ ജനസംഖ്യാവര്‍ധനവില്‍ എക്കാലത്തെയും കുറഞ്ഞ നിരക്കിലേക്ക് രാജ്യം മാറും. ഓഫിസ് ഓഫ് നാഷനല്‍ സ്റ്റാറ്റിസ്റ്റിക്സിന്റെ കണക്കുപ്രകാരം 2034 ആകുമ്പോള്‍ രാജ്യത്തെ ജനസംഖ്യ 71 മില്യണ്‍ മാത്രമായിരിക്കും.
2024നും 2034നും ഇടയ്ക്കുള്ള കാലയളവില്‍ രാജ്യത്ത് 6.4 മില്യണ്‍ കുട്ടികള്‍ ജനിക്കുമെന്നാണ് ഒഎന്‍എസിന്റെ കണക്കുകൂട്ടല്‍. ഇക്കാലയളവില്‍ മരിക്കുന്നവരുടെ എണ്ണം 6.9 മില്യനാകും. 7.3 മില്യണ്‍ ആളുകള്‍ ഇക്കാലയളവില്‍ രാജ്യത്തേക്ക് കുടിയേറുമ്പോള്‍ 5.1 മില്യണ്‍ ആളുകള്‍ നാടുവിട്ട് സ്ഥിരമായി മറ്റു നാടുകളിലേക്ക് താമസം മാറ്റും. ഇതാണ് ഒഎന്‍എസിന്റെ പത്തുവര്‍ഷത്തെ ജനസംഖ്യാ പ്രവചനം.
കാലാന്തരത്തില്‍ കുട്ടികളുടെയും യുവാക്കളുടെയും എണ്ണം കുറയുകയും പെന്‍ഷന്‍ക്കാരുടെ എണ്ണം വര്‍ധിക്കുകയും ചെയ്യുന്ന സ്ഥിതിയിലേക്ക് രാജ്യത്തെ ജനസംഖ്യയുടെ ഘടന മാറുന്നത് ആശങ്കയോടെയാണ് സര്‍ക്കാര്‍ നോക്കിക്കാണുന്നത്. പെന്‍ഷനും ഹെല്‍ത്ത് ആന്‍ഡ് സോഷ്യല്‍ കെയറിനുമുള്ള ചെലവ് വര്‍ധിക്കുന്നതും വര്‍ക്ക്‌ഫോഴ്സിന്റെ ലഭ്യത കുറയുന്നതും സമ്പദ്‌ഘടനയ്ക്ക് ഉണ്ടാക്കുന്ന ആഘാതം ഏറെ വലുതായിരിക്കും.
