ഇന്ധന വില വര്ധന: ഒരു നേരം ഭക്ഷണം ഒഴിവാക്കിയും യാത്രവെട്ടിക്കുറച്ചും യുകെയിലെ മൂന്നു മില്യണ് കുടുംബങ്ങള്
യുദ്ധത്തെ തുടര്ന്ന് ഇന്ധന വില കുതിച്ചതും അവശ്യ സാധനങ്ങളുടെ വില കൂടിയതും മൂലം മുണ്ടു മുറുക്കിയുടുത്തു
യുകെയിലെ മൂന്നു മില്യണ് കുടുംബങ്ങള്. ഇറാന് യുഎസ് സംഘര്ഷങ്ങളുടെ പശ്ചാത്തലത്തില് അസംസ്കൃത എണ്ണയുടെ വില ഉയര്ന്നതോടെ സാധനങ്ങളുടെ വിലയും കൂടി. കുടുംബ ബജറ്റ് താളം തെറ്റിയതോടെ സാധാരണക്കാര് സമ്മര്ദ്ദത്തിലായിരിക്കുകയാണ്. സാമ്പത്തിക സമ്മര്ദ്ദം മൂലം ഭക്ഷണം ചില നേരം ഒഴിവാക്കുന്ന സാഹചര്യത്തിലെത്തി കാര്യങ്ങള് .
ഏപ്രില് 10 വരെയുള്ള കാലയളവിലെ വിച്ച് സംഘടനയുടെ റിപ്പോര്ട്ട് പ്രകാരം ഉപഭോക്താക്കളുടെ ആത്മവിശ്വാസ സൂചിക മൈനസ് 62 ലായി.
സര്വേയില് പങ്കെടുത്തവരില് 71% പേര് അടുത്ത 12 മാസത്തിനുള്ളില് യുകെ സാമ്പത്തിക സ്ഥിതി കൂടുതല് മോശമാകുമെന്ന് കരുതുന്നു. വെറും 9% പേര്ക്ക് മാത്രമാണ് മെച്ചപ്പെടുമെന്ന് പ്രതീക്ഷിക്കുന്നത്. ഭക്ഷണ വിലയില് 85 ശതമാനവും ആശങ്കയിലാണ്.
ചെലവ് നിയന്ത്രിക്കാന് പലരും ഭക്ഷണ ശീലങ്ങള് മാറ്റി. ചില ഇഷ്ടപ്പെട്ട ഭക്ഷണം ഒഴിവാക്കി. 43 ശതമാനത്തോളം പേര് വില കുറഞ്ഞ ഉല്പ്പന്നങ്ങള് വാങ്ങുകയാണ്. പലരും ഓഫറുകളില് സാധനം വാങ്ങുന്ന കാഴ്ചയാണ്. പത്തു കുടുംബത്തില് ഒരു കുടുംബം ഭക്ഷണം ഒഴിവാക്കുമ്പോള് ഏഴില് ഒരാള് ചില ഭക്ഷണങ്ങള് ഒഴിവാക്കി പണം ചെലവാക്കാതെ നോക്കുകയാണ്. ഇന്ധന വില ഉയര്ന്നതോടെ യാത്രകള് പലരും വെട്ടി കുറച്ചു.
പലരും ബില്ലുകള് അടയ്ക്കാനാകാതെ പ്രതിസന്ധിയിലാണ്. ജീവിത ചെലവ് ഉയരുന്നത് കടുത്ത പ്രതിസന്ധിയിലാക്കുകയാണ്. സര്ക്കാര് കൃത്യമായ നടപടി സ്വീകരിച്ച് പ്രശ്ന പരിഹാരമുണ്ടാക്കണമെന്ന ആവശ്യം ശക്തമാണ്.
