പരിവാരമോ ഔദ്യോഗിക വാഹനമോ ഇല്ല; മണ്ണിലിറങ്ങി പിണറായി, ഇനി രണ്ടു മുറി ഫ്ളാറ്റിലേയ്ക്ക്
നിയമസഭാ തിരഞ്ഞെടുപ്പിലെ കനത്ത പരാജയത്തിന് പിന്നാലെ ആളും അകമ്പടിയും പരിവാരങ്ങളുമില്ലാതെ, തിരുവനന്തപുരത്തെത്തി പിണറായി വിജയന്. ഇന്ന് രാവിലെയാണ് പിണറായി വിജയന് കണ്ണൂര് വിമാനത്താവളത്തില് നിന്ന് തിരുവനന്തപുരത്തേക്ക് തിരിച്ചത്. സുരക്ഷാ വാഹനവ്യൂഹത്തിന്റെ അകമ്പടിയൊന്നുമില്ലാതെ, എകെജി സെന്ററില്നിന്നു വന്ന സ്വകാര്യ വാഹനത്തിലാണ് പിണറായി വിജയന് ക്ലിഫ് ഹൗസിലേക്ക് പോയത്.
വി.ശിവന്കുട്ടി, എ.എ.റഹിം, വി.ജോയി എന്നിവര് അദ്ദേഹത്തെ സ്വീകരിക്കാനെത്തിയിരുന്നു. ക്ലിഫ് ഹൗസില് അധികനേരം ചിലവഴിക്കാതെ അദ്ദേഹം എകെജി സെന്ററിലേക്ക് മടങ്ങി. പിണറായി വിജയന് ചിന്താ ഫ്ളാറ്റിലാണ് മുറി ഒരുങ്ങുന്നത്. മൂന്നാം നിലയിലെ 3A, 3B മുറികളാണ് സജ്ജീകരിച്ചത്. പൊളിറ്റ് ബ്യൂറോ അംഗങ്ങള്ക്ക് പാര്ട്ടി അനുവദിക്കുന്നതാണ് ചിന്താ ഫ്ളാറ്റിന്റെ മുറി.
നിയമസഭാ തെരഞ്ഞെടുപ്പ് ഫലം വന്ന് രണ്ടാം ദിവസവും പിണറായി വിജയന് മാധ്യമങ്ങളോട് പ്രതികരിച്ചില്ല. ഇന്ന് രാവിലെ കണ്ണൂര് വിമാനത്താവളത്തില് എത്തിയപ്പോള് മാധ്യമങ്ങള് പ്രതികരണം തേടിയെങ്കിലും മുഖ്യമന്ത്രി പ്രതികരിക്കാന് തയ്യാറായിരുന്നില്ല. എകെജി സെന്ററിലെ വാഹനത്തിലാണ് മുഖ്യമന്ത്രിയുടെ യാത്ര. നാളെയാണ് ക്ലിഫ് ഹൗസ് ഒഴിയുക.
പ്രതിപക്ഷ നേതൃസ്ഥാനത്തേക്ക് പിണറായി വിജയന് എത്തിയേക്കില്ലെന്നാണ് വിവരം. തെരഞ്ഞെടുപ്പിലെ തോല്വിയുടെ ഉത്തരവാദിത്വവും ആരോഗ്യപ്രശ്നങ്ങളും ചൂണ്ടിക്കാട്ടി മാറി നില്ക്കും. കേന്ദ്ര കമ്മിറ്റി അംഗം കെ എന് ബാലഗോപാല് പ്രതിപക്ഷ നേതാവാകാനാണ് സാധ്യത. നാളെ ചേരുന്ന സംസ്ഥാന സെക്രട്ടറിയേറ്റില് ധാരണയുണ്ടാകും. ബാലഗോപാല് തയ്യാറായില്ലെങ്കില് പി എ മുഹമ്മദ് റിയാസും സജി ചെറിയാനുമാണ് സെക്രട്ടറിയേറ്റില് നിന്ന് വിജയിച്ച മറ്റ് അംഗങ്ങള്. ഇവരില് ആരെങ്കിലും ഒരാള് പ്രതിപക്ഷ നേതാവാകും.
