ഇംഗ്ലണ്ട് , സ്‌കോട്ട്‌ലണ്ട്, വെയില്‍സ് എന്നിവിടങ്ങളിലെ ലക്ഷക്കണക്കിന് വോട്ടര്‍മാര്‍ ഇന്ന് പോളിങ് ബൂത്തില്‍. കീര്‍ കീര്‍ സ്റ്റാര്‍മറിനും ലേബര്‍ സര്‍ക്കാരിനും നിര്‍ണായകമായ കൗണ്‍സില്‍ തിരഞ്ഞെടുപ്പ് തുടങ്ങി.
രാവിലെ 7 നു തുടങ്ങിയ വോട്ടെടുപ്പ് രാത്രി 10 വരെ നടക്കും. ഫലങ്ങള്‍ വെള്ളിയാഴ്ച വാരാന്ത്യത്തോടെ പുറത്തുവരുമെന്നാണ് സൂചന. പ്രധാനമന്ത്രി കീര്‍ സ്റ്റാര്‍മര്‍ നയിക്കുന്ന ലേബര്‍ സര്‍ക്കാരിനും ഇതൊരു പരീക്ഷണസമയമാണ്.
ആരോഗ്യവും വിദ്യാഭ്യാസവും ഉള്‍പ്പെടെയുള്ള പ്രധാന മേഖലകളുടെ നിയന്ത്രണം തീരുമാനിക്കുന്ന സ്‌കോട്ടിഷ് പാര്‍ലമെന്റിലേക്കുള്ള എല്ലാ 129 അംഗങ്ങളേയും ഈ തെരഞ്ഞെടുപ്പില്‍ വീണ്ടും തിരഞ്ഞെടുക്കും. ഇന്‍ഡിപെന്‍ഡന്‍സ് മൂവ്‌മെന്റിന് ജനങ്ങള്‍ നല്‍കുന്ന പിന്തുണ എത്രത്തോളമാണെന്നതും ഫലം വ്യക്തമാക്കുമെന്നാണ് നിരീക്ഷണം.
വെയില്‍സില്‍ 1999 മുതല്‍ തുടര്‍ച്ചയായി അധികാരത്തിലുള്ള ലേബര്‍ പാര്‍ട്ടിക്ക് ശക്തമായ വെല്ലുവിളിയാണ് ഇത്തവണ നേരിടേണ്ടിവരുന്നത്. 92 സീറ്റുകളിലേക്കാണ് മത്സരം നടക്കുന്നത്.
നിരവധി യുകെ മലയാളികളും ഇത്തവണ ജനവിധി തേടുന്നുണ്ട്. യുകെയിലെ മലയാളി സമൂഹത്തിന്റെ രാഷ്ട്രീയ സാന്നിധ്യം കൂടുതല്‍ ശക്തമാകുന്നതിന്റെ സൂചനയാണ് ഇതു വിലയിരുത്തപ്പെടുന്നത്. സജീവ പ്രചാരണം നടത്തിയിരുന്നു. ആരോഗ്യ രംഗം, വിദ്യാഭ്യാസം, കുടിയേറ്റ നയം എന്നീ വിഷയങ്ങള്‍ മുന്‍ നിര്‍ത്തിയാണ് പലരും വോട്ടര്‍മാരോട് പ്രചാരണം നടത്തിയത്.
അതേസമയം റിഫോം യുകെ, ഗ്രീന്‍ പാര്‍ട്ടി എന്നിവര്‍ ഇക്കുറി പ്രാദേശിക തെരഞ്ഞെടുപ്പില്‍ നേട്ടം കൊയ്യുമെന്നാണ് മുന്നറിയിപ്പ്. പലസ്തീന്റെ പേരില്‍ വോട്ട് ചോദിച്ച് കൊണ്ട് വര്‍ഗ്ഗീയമായ രീതിയിലേക്കാണ് ഗ്രീന്‍സിന്റെ സാക്ക് പൊളാന്‍സ്‌കി പ്രചരണം നടത്തുന്നത്.
