ലോക്കല്‍ തെരഞ്ഞെടുപ്പില്‍ ലേബറിന് കനത്ത തോല്‍വി സമ്മാനിക്കപ്പെട്ടതോടെ കീര്‍ സ്റ്റാര്‍മര്‍ രാജിവെയ്ക്കണമെന്ന മുറവിളി ശക്തമാണ്. എന്നാല്‍ ഇംഗ്ലണ്ടില്‍ നൂറുകണക്കിന് കൗണ്‍സില്‍ സീറ്റുകള്‍ നഷ്ടപ്പെട്ടതൊന്നും പരിഗണിച്ച് രാജിവെയ്ക്കാനില്ലെന്നാണ് സ്റ്റാര്‍മറുടെ പ്രഖ്യാപനം. ലോക്കല്‍ തെരഞ്ഞെടുപ്പ് ഫലങ്ങള്‍ വിപരീതമായാല്‍ പ്രധാനമന്ത്രിക്ക് നേതൃപദവിക്കായി പോരാട്ടം നടത്തേണ്ടി വരുമെന്നാണ് നേരത്തെ ആശങ്കയുണ്ടായിരുന്നത്. സ്‌കോട്ട്‌ലണ്ട്, വെയില്‍സ് എന്നിവിടങ്ങളിലെ തെരഞ്ഞെടുപ്പ് ഫലങ്ങളും ലേബറിന് ആശ്വാസമേകുന്നതല്ല.
എന്നാല്‍ താന്‍ ഇറങ്ങിപ്പോകാന്‍ തയ്യാറല്ലെന്ന് സ്റ്റാര്‍മര്‍ പറഞ്ഞു. ഇതോടെ യുകെയുടെ 10 വര്‍ഷ ഗില്‍റ്റുകളില്‍ 5 ബേസിസ് പോയിന്റ് താഴ്ന്നു. 30 വര്‍ഷത്തെ ബോണ്ടുകള്‍ 28 വര്‍ഷത്തെ ഉയര്‍ച്ചയില്‍ എത്തിയ ശേഷം താഴ്ന്നു. ഇതെല്ലാം ഗവണ്‍മെന്റ് സ്ഥിരതയോടെ നില്‍ക്കുമെന്ന കണക്കുകൂട്ടലിലാണ്.
സ്റ്റാര്‍മറുടെ പ്രഖ്യാപനത്തോടെ യുകെ ഗവണ്‍മെന്റിന്റെ കടമെടുപ്പ് ചെലവുകള്‍ കുറയുകയും, പൗണ്ടിന്റെ നിരക്ക് വര്‍ദ്ധിക്കുകയും ചെയ്തു. സ്റ്റാര്‍മറുടെ നേതൃസ്ഥാനത്തിന് നേരിടുന്ന സമ്മര്‍ദത്തില്‍ കുറവ് വരുമെന്നാണ് നിരീക്ഷകരുടെ കണക്കുകൂട്ടല്‍. മുന്‍പ് പ്രതീക്ഷിച്ച അത്രയൊന്നും ലേബര്‍ തോറ്റില്ലെന്ന നിലപാടിലാണ് സ്റ്റാര്‍മര്‍ പക്ഷം.
സ്റ്റാര്‍മറുടെ പിന്‍ഗാമികളാകാന്‍ ശ്രമിക്കുന്ന ആഞ്ചെല റെയ്‌നര്‍, എഡ് മിലിബന്ദ്, ആന്‍ഡി ബേണ്‍ഹാം എന്നിവര്‍ തീവ്ര ഇടത് വിഭാഗക്കാരാണ്. ഇവര്‍ കൂടുതല്‍ നികുതി വര്‍ദ്ധനവിനും, ഉയര്‍ന്ന കടമെടുപ്പിനും ഇടയാക്കുമെന്നാണ് ആശങ്ക. ഈ സാഹചര്യത്തില്‍ വിപണി സ്റ്റാര്‍മറെയാണ് കൂടുതല്‍ വിശ്വസിക്കുന്നത്.
