ഡാര്‍ബിയില്‍ നിന്നും പാരിസിലേക്ക് അവധിക്കാല യാത്രയ്ക്കു വാനില്‍ പോയ സംഘത്തിലെ മലയാളി യുവാവിന് ദാരുണാന്ത്യം. വേനല്‍ അവധി ആഘോഷിക്കാന്‍ സുഹൃത്തുക്കള്‍ക്കൊപ്പം പാരിസിലേക്ക് പോയ അങ്കമാലി സ്വദേശിയായ യുവാവ് ഹൃദയാഘാതത്തെ തുടര്‍ന്ന് മരിച്ചതിന്റെ ഞെട്ടലിലാണ് യുകെയിലെ മലയാളി സമൂഹം. ഡാര്‍ബിയില്‍ താമസിച്ചിരുന്ന ജീസ് ജോസാണ് പാരിസില്‍ മരിച്ചത്. ഡാര്‍ബിയില്‍ നിന്ന് വാടക വാനില്‍ ആറംഗസംഘമായി യാത്രതിരിച്ച സംഘത്തിനൊപ്പമുണ്ടായിരുന്ന ജീസിന് വെള്ളിയാഴ്ച രാത്രി അസ്വസ്ഥത അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.
അഞ്ചുവര്‍ഷം മുന്‍പാണ് ജീസ് കുടുംബസമേതം യുകെയിലെത്തിയത്. കെയര്‍ വിസയില്‍ എത്തിയ കുടുംബം ജീവിതം കരുപ്പിടിപ്പിക്കാന്‍ ശ്രമിക്കുന്നതിനിടെയാണ് അപ്രതീക്ഷിത ദുരന്തം സംഭവിച്ചത്. ഭാര്യ ജോയ്‌സി സെബാസ്റ്റ്യന്‍ ഗര്‍ഭിണിയാണ്. 12 വയസ്സും രണ്ട് വയസ്സുമുള്ള രണ്ടു മക്കളുമുണ്ട്. ലെസ്റ്ററിലെ ആശുപത്രിയില്‍ ഫെസിലിറ്റേറ്റര്‍ അസിസ്റ്റന്റായി ജോലി ചെയ്തിരുന്ന ജീസ്, അടുത്തിടെയാണ് കുടുംബത്തോടൊപ്പം ഡാര്‍ബിയിലേക്ക് താമസം മാറ്റിയത്. അങ്കമാലി കിടങ്ങൂര്‍ കുന്നപ്പള്ളി കുടുംബാംഗമായ ജീസിന്റെ വേര്‍പാട് ഡാര്‍ബിയിലെയും ലെസ്റ്ററിലെയും മലയാളി സമൂഹത്തെ ഒരുപോലെ വേദനിപ്പിക്കുകയാണ്.
