മിഡില്‍ ഈസ്റ്റ് സംഘര്‍ഷം യുകെയിലെ ജനജീവിതത്തെ പ്രതികൂലമായി ബാധിച്ചു തുടങ്ങി. ജീവിതച്ചെലവ് പ്രതിസന്ധി കുതിക്കുമെന്ന ആശങ്കയില്‍ യുകെയില്‍ കുടുംബങ്ങള്‍ അതിവേഗം ചെലവ് ചുരുക്കുകയാണ്. 16 മാസത്തിനിടെയുള്ള ഏറ്റവും വേഗത്തിലുള്ള ചെലവുചുരുക്കലാണ് ഇപ്പോള്‍ നടന്നിരിക്കുന്നത്.
യുകെയുടെ ഏറ്റവും വലിയ ബാങ്കുകളില്‍ ഒന്നായ ബാര്‍ക്ലേസാണ് ഈ റിപ്പോര്‍ട്ട് പുറത്തുവിട്ടത്. യുകെയുടെ ക്രെഡിറ്റ്, ഡെബിറ്റ് കാര്‍ഡ് ട്രാന്‍സാക്ഷനുകളില്‍ 40 ശതമാനവും ബാര്‍ക്ലേസാണ് നടത്തുന്നത്. കഴിഞ്ഞ മാസം 0.1% ഇടിവാണ് കാര്‍ഡ് ഇടപാടുകളില്‍ വരുത്തിയിരിക്കുന്നത്. 2024 നവംബറിന് ശേഷം ആദ്യമായാണ് ഈ ഇടിവ്.
അത്യാവശ്യമില്ലാത്ത ചെലവുകള്‍ 0.3 ശതമാനമാണ് കുറച്ചത്. യാത്രാ ചെലവുകള്‍ ഏപ്രില്‍ മാസം 5.7 ശതമാനം കുറച്ചപ്പോള്‍, എയര്‍ലൈന്‍ ചെലവുകള്‍ 8.3 ശതമാനവും കുറഞ്ഞു. ഭക്ഷണം, പാനീയം എന്നിവയുടെ ചെലവും സാരമായി താഴ്ന്നിട്ടുണ്ട്.
കുടുംബങ്ങള്‍ തങ്ങളുടെ പുറത്തുള്ള ചെലവുകള്‍ കാര്യമായി കുറച്ച് ലാഭം പിടിക്കുന്നുണ്ട്. എന്നാല്‍ ഡിജിറ്റല്‍ കണ്ടന്റ്, സബസ്‌ക്രിപ്ഷന്‍ എന്നിവയുടെ ചെലവ് ഏപ്രില്‍ മാസം 9.2 ശതമാനം കൂടുകയാണുണ്ടായത്.
അതേസമയം ഇന്ധനത്തിനായുള്ള ചെലവ് 10.4% വര്‍ദ്ധിച്ചു. 2022 ഡിസംബറിന് ശേഷം ആദ്യമായാണ് ഇത്രയും വര്‍ദ്ധന. ഇറാന്‍ യുദ്ധം എനര്‍ജി വിപണികളെയും, ആഗോള വിതരണ ശൃംഖലയെയും ബാധിക്കുമ്പോള്‍ ഉപഭോക്താക്കളും, ബിസിനസ്സുകളും കഠിനമായ അവസ്ഥയെ നേരിടാനുള്ള തയ്യാറെടുപ്പിലാണെന്ന് കണക്കുകള്‍ വ്യക്തമാക്കുന്നു.
ഉയര്‍ന്ന പണപ്പെരുപ്പം യുകെയ്ക്ക് ഒഴിവാക്കാന്‍ കഴിയില്ലെന്ന് ബാങ്ക് ഓഫ് ഇംഗ്ലണ്ട് മുന്നറിയിപ്പ് നല്‍കി. ശരാശരി എനര്‍ജി ബില്ലുകള്‍ 16% ഉയരാനാണ് സാധ്യത. ഭക്ഷ്യവില വര്‍ഷാവസാനത്തോടെ 7% ഉയരുമെന്നും മുന്നറിയിപ്പില്‍ പറയുന്നു.
