ലിറ്റല്ഹാംപ്ടണില് യുകെ മലയാളി ദമ്പതികളുടെ അഞ്ചുമാസം പ്രായമായ കുഞ്ഞ് മരിച്ചു. അങ്കമാലി മൂക്കന്നൂര് സ്വദേശി പടയാറ്റില് ജിതിന് സാജുവിന്റെ കുഞ്ഞാണ് ആകസ്മികമായി വിടപറഞ്ഞത്. മാള കുമ്പിടി കുടിലിങ്ങില് കുടുംബാംഗം റോസ് മേരിയാണ് ജെസീക്കയുടെ മാതാവ്. രണ്ടാഴ്ച മുന്പ് ചെറിയ ശാരീരിക അസ്വസ്ഥതകള്ക്ക് കുട്ടിയെ ആശുപത്രിയില് എത്തിച്ചു ചികിത്സ തേടിയിരുന്നതാണ്. എന്നാല് ഉറക്കത്തില് കുട്ടിക്ക് ശ്വാസതടസം ഉണ്ടാകും വിധം ഉള്ള അവസ്ഥയില് എത്തിയതാകാം മരണകാരണം എന്നാണ് ഇപ്പോള് അനുമാനിക്കപ്പെടുന്നത്. കുഞ്ഞിന് അനക്കമില്ലെന്നു കണ്ടതിനെ തുടര്ന്ന് എമര്ജന്സി വിഭാഗത്തെ ബന്ധപ്പെട്ടപ്പോള് അവര് എത്തിയാണ് മരണം സ്ഥിരീകരിച്ചത്.
ഇക്കഴിഞ്ഞ ആറാം തിയതി നാട്ടില് എത്തി കുഞ്ഞിന്റെ മാമോദീസ ചടങ്ങുകള് നടത്തി തിരിച്ചെത്തിയ കുടുംബത്തെ തേടിയാണ് തീരാ വേദന എത്തിയിരിക്കുന്നത്. ഒരാഴ്ച മുന്പാണ് ജിതിനും റോസ് മേരിയും കുഞ്ഞുമായി മടങ്ങി യുകെയില് എത്തിയത്.
കുടുംബത്തെ തേടി എത്തിയ ദുരന്തത്തില് ഏറെ ദുഖിതരാണ് പ്രദേശ വാസികളായ മലയാളികളും, ജിതിന്റെയും റോസ് മേരിയുടെയും ഉറ്റ ബന്ധുക്കളില് ചിലര് യുകെയില് ഉള്ളതിനാല് കുഞ്ഞിന്റെ സംസ്കാരം സംബന്ധിച്ച കാര്യങ്ങളില് ഉടനെ തീരുമാനം ഉണ്ടായേക്കും എന്നാണ് കരുതപ്പെടുന്നത്.
സൗത്തംപ്ട്ടനിലോ ലണ്ടനിലോ ഉള്ള ഹോസ്പിറ്റലില് നിന്നുള്ള വിദഗ്ധരുടെ സേവനം ലഭ്യമായാല് മാത്രമേ കുഞ്ഞിന്റെ മരണ കാരണം എന്തെന്ന് അന്തിമമായി കണ്ടെത്താനാകൂ എന്നാണ് കുടുംബത്തിന് ഇപ്പോള് ലഭിക്കുന്ന വിവരം.
