ജനങ്ങള്‍ക്ക് പുതിയ ഷോക്ക് സമ്മാനിക്കാന്‍ എനര്‍ജി ബില്ലുകളില്‍ അടുത്ത വര്‍ധന വരുന്നു. ജൂലൈയിലെ എനര്‍ജി പ്രൈസ് ക്യാപ്പ് പ്രഖ്യാപിക്കാന്‍ റെഗുലേറ്റര്‍ ഓഫ്‌ജം ഒരുങ്ങുമ്പോള്‍ പ്രതിവര്‍ഷം 200 പൗണ്ട് വരെ വര്‍ധനയ്ക്കാണ് വഴിയൊരുങ്ങുന്നത്.
ഇറാന്‍ യുദ്ധത്തിന്റെ ഭാഗമായുള്ള ഏറ്റവും പുതിയ വേദനാജനകമായ തീരുമാനമാകും എനര്‍ജി പ്രൈസ് ക്യാപ്പായി ഓഫ്‌ജെം പ്രഖ്യാപിക്കുക. യുദ്ധം മൂലം മിഡില്‍ ഈസ്റ്റില്‍ നിന്നുള്ള ഓയില്‍, ഗ്യാസ് വിതരണം സാരമായ തടസ്സങ്ങള്‍ നേരിടുകയാണ്.
ജൂലൈ 1 മുതല്‍ ശരാശരി എനര്‍ജി ബില്ലുകള്‍ 19850 പൗണ്ടിലേക്ക് എത്തുമെന്നാണ് കോണ്‍വാള്‍ ഇന്‍സൈറ്റ് പ്രവചിക്കുന്നത്. നിലവിലെ 1641 പൗണ്ടില്‍ നിന്നുമാണ് ഈ വര്‍ധന. മിഡില്‍ ഈസ്റ്റിലെ സംഘര്‍ഷം ജീവിതച്ചെലവ് പ്രതിസന്ധി ശക്തമാക്കുന്നതിനിടെയാണ് ഇതുകൂടി വരുന്നത്. പണപ്പെരുപ്പം ലേബര്‍ ഗവണ്‍മെന്റിന് കനത്ത സമ്മര്‍ദമാണ് സൃഷ്ടിക്കുന്നത്.
തുടര്‍ച്ചയായ മാസങ്ങളില്‍ ദൈനംദിന ആവശ്യങ്ങള്‍ക്കുള്ള സാധനങ്ങളുടെ വില അതിവേഗം ഉയര്‍ന്നതായി ആസ്ദയുടെ ട്രാക്കര്‍ വെളിപ്പെടുത്തി. ജോലി ചെയ്ത് ജീവിക്കുന്ന കുടുംബങ്ങളുടെ വരുമാനത്തേക്കാള്‍ അതിവേഗത്തിലാണ് വിലവര്‍ദ്ധന. തുടര്‍ച്ചയായി മൂന്ന് മാസമായി ഈ സ്ഥിതിയാണ്.
യുദ്ധത്തിന്റെ ഫലമായി പെട്രോള്‍, ഡീസല്‍ വില ഉയരുന്നത് ഉപഭോക്താക്കള്‍ക്കും തിരിച്ചടിയാണ്. താരിഫ് കുറച്ച് നിര്‍ത്താന്‍ ഓഫ്‌ജെം ഏര്‍പ്പെടുത്തുന്ന ക്യാപ്പാണ് ജനങ്ങള്‍ക്ക് എനര്‍ജി ബില്ലുകളില്‍ അല്‍പ്പം ആശ്വാസം നല്‍കുന്നത്.
