തുടര്‍ച്ചയായ ദിവസങ്ങളില്‍ യുകെ മലയാളി സമൂഹത്തിനു വേദനയായി മരണവാര്‍ത്ത. യോഗ പരിശീലിക്കുന്നതിനിടെ ഈസ്റ്റ് ഹാമില്‍ ഹൃദയാഘാതം സംഭവിച്ച മലയാളി യുവതി മരണമടഞ്ഞു. ഈസ്റ്റ് ഹാമിലെ സിസിലി കൃഷ്ണ(41) യാണ് കഴിഞ്ഞ ദിവസം യോഗ പരിശീലനം നടത്തുമ്പോള്‍ കുഴഞ്ഞുവീണത്.
ഹൃദയാരോഗ്യ പ്രശ്‌നങ്ങള്‍ പരിഹരിക്കാനുള്ള ശ്രമത്തിലായിരുന്നു സിസിലി. ഇതിന്റെ ഭാഗമായി യോഗ പരിശീലനം നടത്തുമ്പോഴാണ് സിസിലി കൃഷ്ണയെ തേടി ഹൃദയാഘാതം എത്തുന്നത്. ഡോക്ടര്‍മാരുടെ നിര്‍ദ്ദേശ പ്രകാരമുള്ള മരുന്നുകളും ചികിത്സയും തുടങ്ങിയിരിക്കേയാണ് വിധി വില്ലനായത്.
യോഗ പരിശീലനത്തില്‍ ആരോഗ്യ പ്രവര്‍ത്തകര്‍ അടക്കം സാക്ഷികളാകവേയാണ് സിസിലിക്ക് ദേഹാസ്വാസ്ഥ്യം അനുഭവപ്പെടുന്നത്. ഉടന്‍ ആശുപത്രിയില്‍ എത്തിച്ചെങ്കിലും രണ്ടു നാള്‍ ജീവന് വേണ്ടി പോരാടിയ ശേഷമാണ് മരണത്തിനു കീഴടങ്ങുന്നത്.
സിസിലിയുടെ മാതാപിതാക്കള്‍ അടക്കം വര്‍ഷങ്ങള്‍ക്ക് മുന്‍പേ യുകെയില്‍ കുടിയേറിയവരാണ്. കൊല്ലം സ്വദേശികളാണ് ഈ കുടുംബം. അശോകാണ് സിസിലിയുടെ ഭര്‍ത്താവ്, മക്കള്‍ റയോനും റീസും. ആരോഗ്യ സംരക്ഷണ വകുപ്പില്‍ സര്‍ക്കാര്‍ ജീവനക്കാരിയാണ് സിസിലി. അപ്രതീക്ഷിതമായുള്ള വിയോഗത്തില്‍ ഞെട്ടലിലാണ് പ്രിയപ്പെട്ടവര്‍.
