ഇന്ത്യന്‍-പാകിസ്ഥാനി കുടിയേറ്റക്കാര്‍ക്കെതിരെ കുടിയേറ്റ വിരുദ്ധ പരാമര്‍ശം നടത്തി ബ്രിട്ടീഷ് പാര്‍ലമെന്റ് അംഗം. നിലവില്‍ തൊഴിലില്ലാത്ത ബ്രിട്ടീഷുകാര്‍ക്ക് നല്‍കേണ്ട ജോലികള്‍ക്കായി യുകെ ലക്ഷക്കണക്കിന് പാകിസ്ഥാനികളെയും ഇന്ത്യക്കാരെയും 'ഇറക്കുമതി' ചെയ്യരുതെന്ന് ഗ്രേറ്റ് യാര്‍മൗത്തില്‍ നിന്നുള്ള സ്വതന്ത്ര യുകെ എം.പിയായ റൂപര്‍ട്ട് ലോവ്പറഞ്ഞു. തൊഴിലില്ലാത്ത ബ്രിട്ടീഷുകാര്‍ ചെയ്യേണ്ട ജോലികള്‍ക്കായി ലക്ഷക്കണക്കിന് പാകിസ്ഥാനികളെയും ഇന്ത്യക്കാരെയും ഇങ്ങോട്ട് കൊണ്ടുവരണമെന്ന് താന്‍ വിശ്വസിക്കുന്നില്ലെന്നും, ഇതിന്റെ പേരില്‍ തന്നെ വംശീയവാദി എന്ന് വിളിക്കുകയാണെങ്കില്‍ അങ്ങനെയാകട്ടെ എന്നും ലോവ് എക്‌സില്‍ കുറിച്ചു
ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്‌സിന്റെ 2021-ലെ സെന്‍സസ് പ്രകാരം, ഏകദേശം ഒരു ലക്ഷത്തോളം ജനസംഖ്യയുള്ള ലോവിന്റെ മണ്ഡലമായ ഗ്രേറ്റ് യാര്‍മൗത്തില്‍ ഇന്ത്യന്‍-പാകിസ്ഥാനി വംശജരായ 907 നിവാസികള്‍ മാത്രമാണുള്ളത്. ഇത് മണ്ഡലത്തിലെ ആകെ ജനസംഖ്യയുടെ ഒരു ശതമാനത്തിലും താഴെ മാത്രമാണ്. ഔദ്യോഗിക കണക്കുകള്‍ പ്രകാരം ഗ്രേറ്റ് യാര്‍മൗത്തിലെ തൊഴിലില്ലായ്മ നിരക്ക് 9.8 ശതമാനമാണ്. ഇത് യുകെയുടെ ദേശീയ ശരാശരിയായ 5.4 ശതമാനത്തേക്കാള്‍ വളരെ കൂടുതലാണ്.
അതേസമയം, ഓക്‌സ്‌ഫോര്‍ഡ് സര്‍വകലാശാലയിലെ മൈഗ്രേഷന്‍ ഒബ്‌സര്‍വേറ്ററിയുടെ കണക്കുകള്‍ വ്യക്തമാക്കുന്നത്, കടുത്ത തൊഴിലാളി ക്ഷാമം നേരിടുന്ന മേഖലകളിലാണ് കുടിയേറ്റ തൊഴിലാളികള്‍ കൂടുതലായി ജോലി ചെയ്യുന്നതെന്നാണ്. അവരുടെ റിപ്പോര്‍ട്ട് അനുസരിച്ച്, ദേശീയതലത്തില്‍ 2025 ഡിസംബറിലെ കണക്കുകള്‍ പ്രകാരം യുകെ ഇതര പൗരന്മാര്‍ 65 ലക്ഷം ജോലികളാണ് കൈകാര്യം ചെയ്യുന്നത്.
