മുന്‍ ഹെല്‍ത്ത് സെക്രട്ടറി വെസ് സ്ട്രീറ്റിംഗ് ലേബര്‍ പാര്‍ട്ടിയുടെ നേതൃപദവിയിലേക്ക് എത്താനുള്ള പോരാട്ടത്തിലാണ് . സ്റ്റാര്‍മര്‍ ക്യാബിനറ്റില്‍ നിന്നും രാജിവെച്ച എംപി ഇപ്പോള്‍ തന്റെ പ്രധാനമന്ത്രിയുടെ നിലപാടുകളില്‍ നിന്നും അകലം പാലിക്കാനുള്ള ശ്രമത്തിലാണ്. ലേബര്‍ ഗവണ്‍മെന്റ് വര്‍ദ്ധിപ്പിച്ച എംപ്ലോയര്‍ നാഷണല്‍ ഇന്‍ഷുറന്‍സ് താന്‍ നേതൃപദവിയില്‍ എത്തിയാല്‍ വെട്ടിക്കുറയ്ക്കുമെന്നാണ് വെസ് സ്ട്രീറ്റിംഗ് വ്യക്തമാക്കിയിട്ടുള്ളത്.
കൂടാതെ യുവാക്കളെ ജോലിക്കായി എടുക്കുന്നതിന് സ്ഥാപനങ്ങള്‍ക്ക് കൂടുതല്‍ ഇന്‍സെന്റീവുകള്‍ നല്‍കാനും അദ്ദേഹം പദ്ധതിയിടുന്നു. എണ്ണ കമ്പനികളില്‍ നിന്നും കൂടുതല്‍ നികുതി കണ്ടെത്താനും നീക്കമുണ്ട്. ഇതിനായി നോര്‍ത്ത് സീയില്‍ പുതിയ എണ്ണ, ഗ്യാസ് ഡ്രില്ലിംഗ് അനുവദിക്കുമെന്നും സണ്‍ഡേ ടൈംസിന് നല്‍കിയ അഭിമുഖത്തില്‍ സ്ട്രീറ്റിംഗ് വ്യക്തമാക്കി.
കീര്‍ സ്റ്റാര്‍മര്‍ ഗവണ്‍മെന്റിന്റെ നയങ്ങളില്‍ നിന്നും അകലം പാലിക്കുന്ന നിലപാടാണ് സ്ട്രീറ്റിംഗ് ഇപ്പോള്‍ പങ്കുവെയ്ക്കുന്നത്. ലേബര്‍ നേതൃപോരാട്ടം ഉണ്ടായാല്‍ സ്റ്റാര്‍മര്‍ക്കെതിരെ മത്സരിക്കാനുണ്ടാകുമെന്ന് മുന്‍ മന്ത്രി പറയുന്നു. യൂറോപ്യന്‍ യൂണിയനില്‍ രാജ്യത്തെ തിരികെ കെട്ടാനും, ധനികര്‍ക്ക് നികുതി ഏര്‍പ്പെടുത്താനും ഇദ്ദേഹത്തിന് പരിപാടിയുണ്ട്.
ഇതിനിടയിലാണ് യുവാക്കള്‍ക്കിടയിലെ തൊഴിലില്ലായ്മ പരിഹരിക്കാന്‍ നാഷണല്‍ ഇന്‍ഷുറന്‍സ് കട്ട് എന്ന ആശയം സ്ട്രീറ്റിംഗ് മുന്നോട്ട് വെയ്ക്കുന്നത്. അധികാരത്തിലെത്തിയ ശേഷം ആദ്യ ബജറ്റില്‍ തന്നെ എംപ്ലോയര്‍ നാഷണല്‍ ഇന്‍ഷുറന്‍സ് 13.8 ശതമാനത്തില്‍ നിന്നും 15 ശതമാനത്തിലേക്ക് ഉയര്‍ത്തുകയും, ഇത് അടയ്‌ക്കേണ്ട ശമ്പളപരിധി 9100 പൗണ്ടില്‍ നിന്നും 5000 പൗണ്ടായി കുറയ്ക്കുകയും ചെയ്തു.
