യുകെയിലെത്തിച്ച മലയാളി യുവാവിന് വിസാ പ്രകാരം വാഗ്ദാനം ചെയ്ത ജോലി നിഷേധിച്ചതിന് 30000 പൗണ്ട് തൊഴിലുടമ നഷ്ടപരിഹാരം നല്‍കണമെന്ന് തൊഴില്‍ ട്രൈബ്യൂണല്‍ വിധിച്ചു. ഒരു വര്‍ഷത്തെ ശമ്പളവും ആനുകൂല്യങ്ങളുമടക്കം ആണിത്. ബ്രക്‌സിറ്റിന് ശേഷമുള്ള വിസാ നയമനുസരിച്ചാണ് രോഗി പരിചരണത്തിനുള്ള തൊഴില്‍ വീസയില്‍ ഷബിന്‍ ഷാജി 2023 ല്‍ ബ്രിട്ടനിലെ സ്റ്റാന്‍ഫഡിലെത്തിയത്. എന്നാല്‍ ഒരു വര്‍ഷത്തോളം തൊഴിലുടമയായ സ്വാന്‍ കെയര്‍ സൊല്യൂഷന്‍സ് ഒരു ജോലിയും നല്‍കിയില്ല എന്നായിരുന്നു പരാതി.
ആരോഗ്യ മേഖലയില്‍ യുകെയില്‍ ഒട്ടേറെ ഒഴിവുകളുണ്ടെന്ന യൂട്യൂബ് ഇന്‍ഫ്‌ളുവന്‍സറുടെ പ്രചാരണത്തില്‍ വിശ്വസിച്ചാണ് ഷിബിന്‍ കേരളത്തിലെ ജോലി ഉപേക്ഷിച്ച് യുകെയില്‍ പോകാന്‍ തീരുമാനിച്ചത്. യൂട്യൂബറാണ് ഏജന്റിനെ പരിചയപ്പെടുത്തിയത്. 17000 പൗണ്ട് ഏജന്റിന് നല്‍കി. തുടര്‍ന്നാണ് വാട്‌സ് ആപ് വഴി യുകെ കനപ്‌നി അഭിമുഖം നടത്തിയത്. തുടര്‍ന്നാണ് വാട്‌സ്ആപ് വഴി യുകെ കമ്പനി അഭിമുഖം നടത്തിയത്.
സ്റ്റാന്‍ഫഡിലെത്തിയ ഷാജിക്ക് കമ്പനി സ്‌പോണ്‍സര്‍ സര്‍ട്ടിഫിക്കറ്റ് അനുവദിച്ചെങ്കിലും ഒരു ദിവസം പോലും ജോലി നല്‍കിയില്ല. സ്‌പോണ്‍സറുമായി കരാറുള്ളതിനാല്‍ വേറെ ജോലിക്ക് അപേക്ഷിക്കാനുമായില്ല. ഒരു വര്‍ഷത്തോളം സൗജന്യ ഭക്ഷണം നല്‍കുന്ന കേന്ദ്രങ്ങളെ ആശ്രയിക്കേണ്ടിവന്നതായി ട്രൈബ്യൂണല്‍ പരിഗണിച്ചു.
