അത്യാഹിത വിഭാഗത്തിലെ തിരക്ക് കുറയ്ക്കാന് ഡിജിറ്റല് സംവിധാനം; വരുന്നത് 18 ആശുപത്രികളില്
അത്യാഹിത വിഭാഗത്തിലെ തിരക്ക് കുറയ്ക്കാന് പുതിയ പദ്ധതിയുമായി എന്എച്ച്എസ്. ആശുപത്രിയിലെ അടിയന്തര സേവന വിഭാഗത്തില് തിരക്ക് കുറയ്ക്കാനും ആരോഗ്യ മേഖലയിലെ സമ്മര്ദ്ദം കുറയ്ക്കാനും ഡിജിറ്റല് ട്രിയാജ് സംവിധാനം കൊണ്ടുവരാനാണ് തീരുമാനം.
എന്എച്ച്എസ് ആശുപത്രിയിലെ അടിയന്തര സേവന വിഭാഗത്തില് തിരക്ക് കുറയ്ക്കാനും ആരോഗ്യ മേഖലയിലെ സമ്മര്ദ്ദം കുറയ്ക്കാനും പുതിയ പദ്ധതി വരുന്നു. നിലവില് 18 ആശുപത്രികളില് പരീക്ഷണ അടിസ്ഥാനത്തില് ഇതു നടപ്പിലാക്കും. അത്യാഹിത വിഭാഗത്തിലെത്തുന്ന രോഗികളില് ആദ്യം അവരുടെ രോഗ ലക്ഷണങ്ങള് ഡിജിറ്റല് സംവിധാനത്തില് രേഖപ്പെടുത്തും. തുടര്ന്ന് ആരോഗ്യ പ്രവര്ത്തകര് രോഗിയുടെ അവസ്ഥ വിലയിരുത്തി അടിയന്തര ചികിത്സ വേണമോ എന്ന് തീരുമാനിക്കും.
അടിയന്തര പരിചരണം വേണ്ടവരെ ഉടന് ചികിത്സ നല്കും. എന്നാല് ഗുരുതരമല്ലാത്ത അവസ്ഥയെങ്കില് മറ്റൊരു ദിവസം ഡോക്ടറുടെ അപ്പോയ്ന്റ്മെന്റ് നല്കും. ചിലരെ ജിപിയുടെ സേവനത്തിലേക്കോ ഫാര്മസികളിലേക്ക് ഫിസിയോ തെറാപ്പിയിലേക്കോ റഫര് ചെയ്യും.
ഈ സംവിധാനം എല്ലാ എന്എച്ച്എസ് ട്രസ്റ്റുകളും നടപ്പിലാക്കണമെന്ന് എന്എച്ച്എസ് ചീഫ് എക്സിക്യൂട്ടിവ് ജിം മാക്കേ പറഞ്ഞു.
പുതിയ സംവിധാനം വന്നതിന് ശേഷം ഈസ്റ്റ് ലങ്കാഷെയര് ടീച്ചിങ് ഹോസ്പിറ്റല് എന്എച്ച്എസ് ട്രസ്റ്റിന്റെ അത്യാഹിത രോഗികളുടെ ശരാശരി കാത്തിരിപ്പ് സമയം 178 മിനിറ്റില് നിന്ന് 94 മിനിറ്റായി ഏകദേശം പകുതിയായി കുറഞ്ഞതായി എന്എച്ച്എസ് അറിയിച്ചു.
