മിഡില് ഈസ്റ്റ് പ്രതിസന്ധിയെ തുടര്ന്ന് ഊര്ജ്ജ വില ഉയര്ന്നതു ബ്രിട്ടീഷ് സമ്പദ് വ്യവസ്ഥയെ ബാധിച്ചതായി റിപ്പോര്ട്ട്. ഏപ്രിലില് രാജ്യത്തിന്റെ ജിഡിപി 0.1 ശതമാനം കുറഞ്ഞതായി കണക്കുകള് വ്യക്തമാക്കുന്നു. മാര്ച്ചില് 0.3 ശതമാനം വളര്ച്ച രേഖപ്പെടുത്തിയ ശേഷമാണ് സമ്പദ് വ്യവസ്ഥ തിരിച്ചടി നേരിട്ടത്.
ഹോര്മുസ് കടലിടുക്ക് അടച്ചതോടെ ഊര്ജ്ജവില ഉയര്ന്നു, ഇതാണ് തിരിച്ചടിക്ക് പ്രധാന കാരണം. സേവന മേഖലയിലെ ഉത്പാദനം 0.2 ശതമാനം ഇടിഞ്ഞപ്പോള് നിര്മ്മാണ മേഖലയില് 0.1 ശതമാനം വര്ധിച്ചു.
ഊര്ജ്ജ ചെലവുയര്ന്നതും മറ്റ് സാമ്പത്തിക പ്രതിസന്ധികളും ഈ വര്ഷത്തിലെ മറ്റ് മാസങ്ങളിലും സാമ്പത്തിക വളര്ച്ച മന്ദഗതിയിലാക്കുമെന്നാണ് വിദഗ്ധരുടെ മുന്നറിയിപ്പ്. യുദ്ധം അവസാനിച്ചാലും മാസങ്ങളോളം പ്രതിസന്ധി തുടരുമെന്നാണ് വിദഗ്ധര് വിലയിരുത്തുന്നത്. യഥാര്ത്ഥ സാമ്പത്തിക ആഘാതത്തിന്റെ വിവരങ്ങള് പുറത്തുവരാനിരിക്കുന്നതേയുള്ളൂവെന്നാണ് വിദഗ്ധര് വ്യക്തമാക്കുന്നത്.
