ബ്രിട്ടനില്‍ വ്യാഴാഴ്ച്ചയോടെ രണ്ടാം ഉഷ്ണതരംഗം എത്തുമെന്ന് മുന്നറിയിപ്പ്. താപനില 30 ഡിഗ്രി സെല്‍ഷ്യസില്‍ എത്തുമെന്നും മുന്നറിയിപ്പില്‍ പറയുന്നു. തെക്കന്‍ ഇംഗ്ലണ്ടിന്റെയും മിഡ്‌ലാന്‍ഡ്‌സിന്റെയും ചില ഭാഗങ്ങളില്‍ അതിയായ ചൂട് അനുഭവപ്പെടും. ഇത് അടുത്ത ഞായറാഴ്ച്ച വരെ നാല് ദിവസത്തോളം തുടരുകയും ചെയ്യുമെന്നും മുന്നറിയിപ്പില്‍ പറയുന്നു. തെക്ക് കിഴക്കന്‍ ഇംഗ്ലണ്ട്, കിഴക്കന്‍ ഇംഗ്ലണ്ട്, കിഴക്കന്‍ മിഡ്‌ലാന്‍ഡ്‌സ്, ലണ്ടന്‍ എന്നിവിടങ്ങളില്‍ ബുധനാഴ്ച്ച ഉച്ച മുതല്‍ മഞ്ഞ മുന്നറിയിപ്പ് നിലവില്‍ വരുമെന്ന് യു കെ ആരോഗ്യ സുരക്ഷാ ഏജന്‍സി അറിയിച്ചിട്ടുണ്ട്.
ആരോഗ്യ പ്രശ്‌നങ്ങളെ കുറിച്ചും, ആരോഗ്യ - സോഷ്യല്‍ കെയര്‍ രംഗങ്ങളില്‍ ഉണ്ടാകാനിടയുള്ള സമ്മര്‍ദ്ദത്തെ കുറിച്ചും പരാമര്‍ശിക്കുന്ന ഈ മുന്നറിയിപ്പ് വരുന്ന തിങ്കളാഴ്ച്ച വരെ പ്രാബല്യത്തില്‍ ഉണ്ടായിരിക്കും. ലണ്ടനില്‍, തുടര്‍ച്ചയായി മൂന്ന് ദിവസം താപനില 28 ഡിഗ്രി സെല്‍ഷ്യസോ അതില്‍ കൂടുതലോ ആയി തുടരുകയാണെങ്കിലാണ് ഉഷ്ണതരംഗം എന്ന് ഔദ്യോഗികമായി കണക്കാക്കുന്നത്. വരും ദിവസങ്ങളില്‍ താപനില ഉയര്‍ന്ന് വ്യാഴാഴ്ച്ചയാകുമ്പോഴേക്കും താപനില 28 ഡിഗ്രിയില്‍ എത്തുമെന്നാണ് മെറ്റ് ഓഫീസ് പറയുന്നത്.
ഇംഗ്ലണ്ടിലും വെയിസിലും ആഞ്ഞടിച്ച, റെക്കോര്‍ഡ് ചൂട് അനുഭവപ്പെട്ട ഒരു ഉഷ്ണതരംഗത്തിനു ശേഷം മൂന്ന് ആഴ്ച്ചകള്‍ക്കിപ്പുറമാണ് ഇപ്പോള്‍ മറ്റൊരു ഉഷ്ണതരംഗം ഉണ്ടാകുന്നത്. ആദ്യ തരംഗത്തില്‍ ഇംഗ്ലണ്ടില്‍ 35.1 ഡിഗ്രി സെല്‍ഷ്യസ് വരെയും വെയില്‍സില്‍ 32.9 ഡിഗ്രി സെല്‍ഷ്യസ് വരെയും ചൂട് അനുഭവപ്പെട്ടിരുന്നു. കഴിഞ്ഞ വാരാന്ത്യത്തിലും ഉഷ്ണതരംഗത്തിനുള്ള സാധ്യത മെറ്റ് ഓഫീസ് പ്രവചിച്ചിരുന്നെങ്കിലും താപനില 24.1 ഡിഗ്രി സെല്‍ഷ്യസ് വരെ മാത്രമെ ഉയര്‍ന്നിരുന്നുള്ളു. ഇന്ന് പൊതുവെ മിതോഷ്ണ കാലാവസ്ഥയായിരിക്കും അനുഭവപ്പെടുക എന്നും മെറ്റ് ഓഫീസ് അറിയിച്ചിട്ടുണ്ട്.
