സെല്‍ഫ് എന്യുമറേഷന് സെന്‍സസ് നടപടികള്‍ക്ക് തുടക്കം; പ്രവാസി മലയാളികള്‍ക്ക് ബാധകമാകില്ല
2027 ലെ ജനസംഖ്യാ കണക്കെടുപ്പിന്റെ ഭാഗമായുളള സെല്‍ഫ് എന്യുമറേഷന് ഇന്ന് തുടക്കം. ജനങ്ങള്‍ക്ക് വിവരങ്ങള്‍ സ്വയം രേഖപ്പെടുത്തുന്നതിനുള്ള സെല്‍ഫ് എന്യുമറേഷന് സൗകര്യമടക്കം ഇന്ന് ലഭ്യമാകും. ഈ മാസം 30 വരെ se.census. gov.in എന്ന പോര്‍ട്ടലിലൂടെ വിവരങ്ങള്‍ രേഖപ്പെടുത്താം. രണ്ട് ഘട്ടങ്ങളിലായാണ് സെന്‍സസ് നടപടികള്‍ പൂര്‍ത്തിയാക്കുക.
ജനങ്ങള്‍ സ്വയം രേഖപ്പെടുത്തിയ വിവരങ്ങള്‍ ഉദ്യോഗസ്ഥര്‍ പരിശോധിച്ച ശേഷമാകും അന്തിമമാക്കുക. പ്രവാസി മലയാളികള്‍ക്ക് സെന്‍സസ് ബാധകമാകില്ലെന്ന് ചീഫ് പ്രിന്‍സിപ്പല്‍ സെന്‍സസ് ഓഫീസര്‍ മിത്ര ടി ഐ എ എസ് വ്യക്തമാക്കിയിട്ടുണ്ട്. 2027 ലെ സെന്‍സസ് നടപടികള്‍ക്കാണ് ഇന്ന് തുടക്കമാകുന്നത്. വിവരങ്ങള്‍ സ്വയം രേഖപ്പെടുത്തുന്നതിനുള്ള സെല്‍ഫ് എന്യുമറേഷന് സൗകര്യമാണ് ഇന്ന് മുതല്‍ ലഭ്യമാകുക.
15 വ‍ര്‍ഷത്തിന് ശേഷമാണ് രാജ്യത്ത് സെന്‍സസ് നടപ്പാക്കുന്നത്. 2011 ലാണ് അവസാന സെന്‍സസ് നടന്നത്. പത്ത് വര്‍ഷത്തിലൊരിക്കല്‍ നടക്കേണ്ടിയിരുന്ന സെന്‍സസ് 2021 ല്‍ കൊവിഡ് കാരണം നടന്നില്ല. ഇത്തവണ ആദ്യമായി ഡിജിറ്റല്‍ സെന്‍സസ് നടപ്പാക്കുകയാണ്. സര്‍ക്കാര്‍ തയ്യാറാക്കിയിട്ടുള്ള പോര്‍ട്ടലില്‍ ജനങ്ങള്‍ക്ക് സ്വയം വിവരങ്ങള്‍ രേഖപ്പെടുത്താനാകും. രണ്ട് ഘട്ടമായി നടക്കുന്ന സെന്‍സസില്‍ ആദ്യ ഘട്ടത്തില്‍ വീട്ടുവിവരങ്ങളാണ് ശേഖരിക്കുക.
