യുകെയിലെ പ്രവാസി മലയാളി സമൂഹത്തിന് അഭിമാനമായി കോട്ടയം സ്വദേശിക്ക് ലണ്ടനില് ആദരം. മറ്റക്കര സ്നേഹാസ് വിഷന് ചാരിറ്റബിള് സ്ഥാപകനായ സജി കുര്യന് (തങ്കച്ചന്) എന്എച്ച്എസ് ഹോസ്പിറ്റലിന്റെ 'ബെസ്റ്റ് എംപ്ലോയി' അവാര്ഡിന് അര്ഹനായി. കഴിഞ്ഞ 22 വര്ഷമായി എന്എച്ച്എസ് ഹോസ്പിറ്റലില് സേവനമനുഷ്ഠിക്കുന്ന സജി കുര്യന്, തന്റെ പ്രവര്ത്തന മികവിലൂടെയും സഹപ്രവര്ത്തകരോടുള്ള ഹൃദ്യമായ ഇടപെടലുകളിലൂടെയുമാണ് ഈ വലിയ നേട്ടം കൈവരിച്ചത്.
എല്ലാവരെയും ആകര്ഷിക്കുന്ന അദ്ദേഹത്തിന്റെ സവിശേഷ സ്വഭാവം കൊണ്ടാണ്, തദ്ദേശീയര് കൂടുതല് ജോലി ചെയ്യുന്ന ഹോസ്പിറ്റലില് അദ്ദേഹത്തിന് വോട്ട് ലഭിച്ചത്. സജിയുടെ ഒപ്പം ജോലി ചെയ്യുന്ന മലയാളികളായ ഗില്ബര്ട്ടും ജോമോനും അദ്ദേഹത്തെക്കുറിച്ച് ഇതേ അഭിപ്രായമാണ് പറയുന്നത്. തന്റെ ജന്മനാടായ മറ്റക്കരയില് 2015-ല് 'സ്നേഹാസ് വിഷന് ചാരിറ്റബിള്' എന്ന ജീവകാരുണ്യ പ്രസ്ഥാനം ആരംഭിച്ച അദ്ദേഹം, നാട്ടിലുള്ള ബുദ്ധിമുട്ടനുഭവിക്കുന്നവര്ക്കും രോഗികള്ക്കും മക്കള് ഉപേക്ഷിച്ചുപോയ അമ്മമാര്ക്കും അനാഥര്ക്കും അവര്ക്കാഗ്രഹമുള്ള ഭക്ഷണം ഉണ്ടാക്കിക്കൊടുക്കുന്നു.
കൂടാതെ, ഈസ്റ്റര്, ക്രിസ്മസ്, തിരുവോണം എന്നീ ആഘോഷദിവസങ്ങളില് പാവങ്ങള്ക്കും അനാഥര്ക്കും ആവശ്യമായ സാധനങ്ങള് വിതരണം ചെയ്യുന്നു. സിസ്റ്റര്മാരായ ജിവോദയിലെ സിസ്റ്റര് മരിയ, സിസ്റ്റര് അല്ഫോന്സ, സിസ്റ്റര് സിസിലിയ എന്നിവര് സജിയുടെ പ്രവര്ത്തനങ്ങളെ അഭിനന്ദിക്കുകയും അനുമോദനങ്ങള് അറിയിക്കുകയും ചെയ്തു.
