ലണ്ടനില്‍ വന്‍ തീപിടിത്തം; 3 പേര്‍ മരിച്ചു, വൈറ്റ് സിറ്റിയിലെ പവിലിയന്‍ കത്തിനശിച്ചു
പടിഞ്ഞാറന്‍ ലണ്ടനിലെ വൈറ്റ് സിറ്റിയിലെ ന്യൂസിലന്‍ഡ് വേയില്‍ ഉണ്ടായ വന്‍ തീപിടിത്തത്തില്‍ മൂന്ന് പേര്‍ ദാരുണമായി മരിച്ചു. ശനിയാഴ്ച വൈകുന്നേരം 7 മണിയോടെയാണ് സിംഗിള്‍ സ്റ്റോറി പവിലിയനില്‍ തീപിടിത്തമുണ്ടായത്. സംഭവസ്ഥലത്തെത്തിയ അഗ്നിരക്ഷാസേനാംഗങ്ങള്‍ മൂന്ന് പേരെ രക്ഷപ്പെടുത്തി പുറത്തെടുത്തെങ്കിലും രണ്ടുപേര്‍ സ്ഥലത്തുവെച്ചുതന്നെ മരണമടഞ്ഞു. ഗുരുതരമായി പരിക്കേറ്റ മൂന്നാമന്‍ പിന്നീട് ആശുപത്രിയില്‍ ചികിത്സയിലിരിക്കെ മരണത്തിന് കീഴടങ്ങി.
തീ നിയന്ത്രണവിധേയമാക്കാന്‍ ലണ്ടന്‍ ഫയര്‍ ബ്രിഗേഡിന്റെ 15 ഫയര്‍ എന്‍ജിനുകളും നൂറോളം അഗ്നിരക്ഷാസേനാംഗങ്ങളും മണിക്കൂറുകളോളം പരിശ്രമിച്ചു. പവിലിയന്റെ പകുതിയിലധികം ഭാഗം തീയില്‍ നശിച്ചതായി അധികൃതര്‍ അറിയിച്ചു. രാത്രി 9.25ഓടെയാണ് തീ പൂര്‍ണമായും നിയന്ത്രണ വിധേയമാക്കാനായത്.
സംഭവത്തില്‍ മരിച്ചവരുടെ തിരിച്ചറിയല്‍ നടപടികള്‍ പുരോഗമിക്കുകയാണെന്ന് അധികൃതര്‍ അറിയിച്ചു. തീപിടിത്തത്തിന്റെ കാരണം വ്യക്തമല്ലെന്നും വിശദമായ അന്വേഷണം ആരംഭിച്ചതായും ലണ്ടന്‍ ഫയര്‍ ബ്രിഗേഡ് അസിസ്റ്റന്റ് കമ്മീഷണര്‍ പാറ്റ് ഗൗള്‍ബണ്‍ പറഞ്ഞു. മെട്രോപൊളിറ്റന്‍ പൊലീസ് അന്വേഷണത്തിന് പിന്തുണ നല്‍കുന്നുണ്ടെന്നും മരിച്ചവരുടെ കുടുംബങ്ങളെ വിവരം അറിയിക്കുന്ന നടപടികള്‍ തുടരുകയാണെന്നും അധികൃതര്‍ വ്യക്തമാക്കി.
