70 കാരനായ നോര്‍ത്താംപ്ടണ്‍ ബിഷപ്പിനെതിരെ രണ്ട് ബലാത്സംഗ കേസുകള്‍ റെജിസ്റ്റര്‍ ചെയ്തു. 16 വയസ്സില്‍ താഴെ പ്രായമുള്ള ഒരു പെണ്‍കുട്ടിയെ രണ്ട് തവണ ബലാത്സംഗം ചെയ്തതിനാണ് ബിഷപ്പ് ഡേവിഡ് ഓക്ലിക്ക് എതിരെ ഇപ്പോള്‍ പോലീസ് കേസ് ചാര്‍ജ്ജ് ചെയ്തിരിക്കുന്നത്. ഉദ്യോഗസ്ഥര്‍ക്ക് ലഭിച്ച റിപ്പോര്‍ട്ടുകളുടെ അടിസ്ഥാനത്തില്‍ ബിഷപ്പിനെ കഴിഞ്ഞ വര്‍ഷം സെപ്റ്റംബറില്‍ അറസ്റ്റ് ചെയ്തിരുന്നു. തുടര്‍ന്ന്, 2025 ഒക്ടോബറില്‍ ബിഷപ്പ് അനിശ്ചിതകാലത്തേക്ക് ചുമതലകളില്‍ നിന്നും മാറിനില്‍ക്കുന്നതായി നോര്‍ത്താംപ്ടണ്‍ രൂപത അറിയിക്കുകയും ചെയ്തിരുന്നു.
വ്യക്തിപരമായ കാരണങ്ങളാലാണിതെന്നും അറിയിപ്പില്‍ പറഞ്ഞിരുന്നു. എന്നാല്‍, ഇന്നലെ പുറത്തിറക്കിയ പത്രക്കുറിപ്പില്‍, തീര്‍ത്തും ഞെട്ടിപ്പിക്കുന്ന വാര്‍ത്തയാണ് ഇതെന്ന് പറഞ്ഞ രൂപത, കൂടുതല്‍ നിയമനടപടികള്‍ എന്തെല്ലാമായിരിക്കും എന്നതിനെ കുറിച്ച് വ്യക്തത വരുത്തിയില്ല. 2020 ല്‍ ആയിരുന്നു ബിഷപ്പ് ഓക്ലിയെ നോര്‍ത്താംപ്ടണ്‍ ബിഷപ്പായി പോപ്പ് ഫ്രാന്‍സിസ് നിയമിച്ചത്. വരുന്ന ആഗസ്റ്റ് 14 ന് ബിഷപ്പ് കാനോക്ക് മജിസ്‌ട്രേറ്റ് കോടതിയില്‍ ഹാജരാകും.
