കടുത്ത ചൂടിന് പിന്നാലെയെത്തിയ ശക്തമായ ഇടിമിന്നലും മഴയും മോശം കാലാവസ്ഥയും കാരണം ഹീത്രൂ, ഗാറ്റ്‌വിക് വിമാനത്താവളങ്ങളില്‍ ശനിയാഴ്ച നൂറുകണക്കിന് വിമാനങ്ങള്‍ റദ്ദാക്കി. നിരവധി വിമാനങ്ങള്‍ വൈകുകയും ചെയ്തു. തുടര്‍ച്ചയായി 30 ഡിഗ്രി സെല്‍ഷ്യസിന് മുകളിലുള്ള ചൂടിന് പിന്നാലെയാണ് ലണ്ടനിലും തെക്കുകിഴക്കന്‍ ഇംഗ്ലണ്ടിലും രാത്രിയില്‍ ശക്തമായ മഴയും ഇടിമിന്നലും ഉണ്ടായത്.
ഹീത്രൂവിലും ഗാറ്റ്‌വിക്കിലും 600-ലധികം വിമാനങ്ങള്‍ വൈകി. ചില സര്‍വീസുകള്‍ ആറു മണിക്കൂറിലേറെ വൈകിയപ്പോള്‍, നിരവധി വിമാനങ്ങള്‍ റദ്ദാക്കുകയും ചെയ്തു. ഗാറ്റ്‌വിക്കില്‍ നിന്ന് തുര്‍ക്കിയിലെ അന്റാല്യയിലേക്ക് രാവിലെ പുറപ്പെടേണ്ട ഒരു വിമാനം ഏകദേശം ആറു മണിക്കൂര്‍ വൈകിയാണ് ലക്ഷ്യസ്ഥാനത്തെത്തുകയെന്ന് അറിയിപ്പ് ലഭിച്ചു.
യുകെയുടെ എയര്‍ ട്രാഫിക് കണ്‍ട്രോള്‍ സേവനമായ നാറ്റ്‌സ്, തെക്കുകിഴക്കന്‍ ഇംഗ്ലണ്ടിലെ പ്രതികൂല കാലാവസ്ഥ കാരണം ദിവസമാകെ വിമാന സര്‍വീസുകള്‍ തടസപ്പെടാന്‍ സാധ്യതയുണ്ടെന്ന് മുന്നറിയിപ്പ് നല്‍കി.
വിമാനത്താവളങ്ങളിലും വിമാനങ്ങളിലുമായി മണിക്കൂറുകളോളം കുടുങ്ങിയ യാത്രക്കാര്‍ വളരെ അസ്വസ്ഥരായിരുന്നു. പെട്ടെന്ന് വിമാനം റദ്ദാക്കലും വൈകലും യാത്രക്കാരെ ബുദ്ധിമുട്ടിലാഴ്ത്തി..
പ്രതികൂല കാലാവസ്ഥയും എയര്‍ ട്രാഫിക് നിയന്ത്രണങ്ങളും കാരണം സര്‍വീസുകളില്‍ മാറ്റം വരുത്തേണ്ടിവന്നതായി ബ്രിട്ടീഷ് എയര്‍വേസ് അറിയിച്ചു. യാത്രക്കാര്‍ക്ക് ഉണ്ടായ അസൗകര്യത്തില്‍ ഖേദം പ്രകടിപ്പിച്ച് കമ്പനി രംഗത്തുവരികയും ചെയ്തു.
