ബേണ്‍ഹാം വരുന്നത് നികുതിഭാരവുമായി? ഇന്‍കം ടാക്‌സ്, ഫ്യൂവല്‍ ഡ്യൂട്ടി ആഘാതത്തിന് സാധ്യത
കീര്‍ സ്റ്റാര്‍മറുടെ പിന്‍ഗാമിയായി ബ്രിട്ടന്റെ അടുത്ത പ്രധാനമന്ത്രിയാകാന്‍ തയ്യാറെടുക്കുന്ന ആന്‍ഡി ബേണ്‍ഹാം നികുതി വര്‍ദ്ധനവുകളും ആയാവും എത്തുക എന്ന് മുന്നറിയിപ്പ്. ജീവിതകാലത്തെ ഏറ്റവും വലിയ മാറ്റം സമ്മാനിക്കുമെന്ന ബേണ്‍ഹാമിന്റെ പ്രഖ്യാപനം ഒരു മുന്നറിയിപ്പായി കാണാനാണ് സാമ്പത്തിക വിദഗ്ധര്‍ ആവശ്യപ്പെടുന്നത്.
ഖജനാവ് നേരിടുന്ന 5 മില്ല്യണ്‍ പൗണ്ട് കമ്മി പരിഹരിക്കാന്‍ എളുപ്പവഴിയായി കണ്ടെത്തുക നികുതി വര്‍ദ്ധനവുകളെയാകും. ധനികരെയും, ഉയര്‍ന്ന വരുമാനക്കാരെയുമാണ് നികുതിയില്‍ മുക്കുകയെങ്കിലും ഇന്‍കം ടാക്‌സ് വര്‍ദ്ധനവ് കൂടി ഉള്‍പ്പെടുത്താന്‍ ബേണ്‍ഹാം തയ്യാറാകുമെന്നാണ് കരുതുന്നത്. ചാന്‍സലര്‍ റേച്ചല്‍ റീവ്‌സിന്റെ സാമ്പത്തിക നയങ്ങള്‍ക്ക് വിരുദ്ധമായി ഇന്‍കം ടാക്‌സില്‍ 50% റേറ്റ് ഏര്‍പ്പെടുത്തിയേക്കുമെന്നാണ് സൂചന. നിലവിലെ 45% ഇന്‍കം ടാക്‌സ് റേറ്റിന് പകരമാണ് ഇത്.
ഇതിന് പുറമെ ഫ്യൂവല്‍ ഡ്യൂട്ടിയിലെ ആശ്വാസവും ഇല്ലാതാകാം. ഒരു ദശകത്തിലേറെയായി ഫ്യൂവല്‍ ഡ്യൂട്ടി ഫ്രീസിംഗ് നിലവിലുണ്ട്. എന്നാല്‍ ഈ മരവിപ്പിക്കല്‍ എടുത്തുമാറ്റി പ്രതിവര്‍ഷം 60 പൗണ്ട് മുതല്‍ 100 പൗണ്ട് വരെ കുടുംബങ്ങളുടെ ബില്ലില്‍ ചേര്‍ക്കുമെന്നും സാമ്പത്തിക വിദഗ്ധര്‍ വ്യക്തമാക്കുന്നു.
ലേബര്‍ പാര്‍ട്ടിയിലെ ഇടതുപക്ഷ പ്രധാനമന്ത്രിയാകാനുള്ള ഒരുക്കത്തിലാണ് ആന്‍ഡി ബേണ്‍ഹാം. എന്നാല്‍ രാജ്യത്തിന്റെ സമ്പദ്‌വ്യവസ്ഥ ഒട്ടും അനുയോജ്യമല്ല. സമ്പന്നരെ ലക്ഷ്യമിട്ടുള്ള പല നടപടികളും സാധാരണക്കാരെയും തൊഴിലാളികളെയും ബാധിക്കുമോയെന്ന ആശങ്ക ശക്തമാണ്.
