ഇംഗ്ലണ്ടിലെ ബര്‍മിംഗ്ഹാമിലെ ആലം റോക്ക് പ്രദേശത്ത് ഒരു മോസ്കിന് സമീപം നടന്ന വെടിവയ്പില്‍ 16 വയസ്സുകാരന് ഗുരുതരമായി പരിക്കേറ്റു. ബുധനാഴ്ച വൈകിട്ട് 5.30ഓടെ ബോവിയര്‍ റോഡില്‍ വെടിവയ്പ് നടന്നെന്ന വിവരം ലഭിച്ചതിനെ തുടര്‍ന്ന് പൊലീസ് സ്ഥലത്തെത്തി. വെടിയേറ്റ നിലയില്‍ കണ്ടെത്തിയ കൗമാരക്കാരനെ ഉടന്‍ ആശുപത്രിയിലേക്ക് മാറ്റി. ഇയാളുടെ പരുക്കുകള്‍ ഗുരുതരവും ജീവന് ഭീഷണിയാകാവുന്നതുമാണെന്ന് അധികൃതര്‍ അറിയിച്ചു.
ആക്രമണത്തിന് മോസ്കുമായോ മതപരമായ കാരണങ്ങളുമായോ ബന്ധമുണ്ടെന്ന സൂചന ലഭിച്ചിട്ടില്ലെന്ന് വെസ്റ്റ് മിഡ്‌ലാന്‍ഡ്സ് പൊലീസ് വ്യക്തമാക്കി. സംഭവസ്ഥലത്ത് ഫൊറന്‍സിക് പരിശോധനകളും തെളിവെടുപ്പും തുടരുകയാണ്. സമീപ പ്രദേശങ്ങളിലെ സിസിടിവി ദൃശ്യങ്ങളും മറ്റ് വിവരങ്ങളും പൊലീസ് പരിശോധിച്ചുവരികയാണ്.
സംഭവത്തെ തുടര്‍ന്ന് പ്രദേശത്ത് അധിക പൊലീസ് സാന്നിധ്യം ഏര്‍പ്പെടുത്തിയിട്ടുണ്ട്. വെടിവയ്പ് നേരില്‍ കണ്ടവരോ വാഹന ക്യാമറകളിലോ ഡോര്‍ബെല്‍ ക്യാമറകളിലോ ദൃശ്യങ്ങള്‍ ലഭിച്ചവരോ അന്വേഷണ സംഘത്തെ വിവരം അറിയിക്കണമെന്ന് പൊലീസ് അഭ്യര്‍ഥിച്ചു. പ്രതികളെ കണ്ടെത്താനും സംഭവത്തിന്റെ പശ്ചാത്തലം വ്യക്തമാക്കാനുമായി അന്വേഷണം ഊര്‍ജിതമാക്കിയിരിക്കുകയാണ്.
