കടുത്ത ചൂടില് വാഹനമോടിക്കല്: യുകെയിലെ ഡ്രൈവര്മാര്ക്ക് ജാഗ്രതാ നിര്ദ്ദേശം
യുകെയിലെ താപനില 34 ഡിഗ്രി സെല്ഷ്യസിലെത്തുമെന്ന മുന്നറിയിപ്പിനിടെ വാഹനമോടിക്കുന്നവര്ക്ക് പ്രത്യേക ജാഗ്രതാ നിര്ദേശം. കടുത്ത ചൂടില് നേരിട്ട് പാര്ക്ക് ചെയ്തിരിക്കുന്ന കാറുകളുടെ ഉള്ഭാഗത്തെ താപനില അപകടകരമായ തോതില് ഉയരാനിടയുള്ളതിനാല് യാത്ര തുടങ്ങുന്നതിന് മുമ്പ് വാഹനം നന്നായി തണുപ്പിക്കണമെന്ന് വിദഗ്ധര് നിര്ദേശിച്ചു.
അടച്ചിട്ട വാഹനത്തിനുള്ളിലെ ചൂട് ഡ്രൈവര്മാരുടെ ഏകാഗ്രതയെയും പ്രതികരണശേഷിയെയും ബാധിക്കാമെന്നും ഇത് അപകടസാധ്യത വര്ധിപ്പിക്കാമെന്നും മുന്നറിയിപ്പില് പറയുന്നു. യാത്ര ആരംഭിക്കുന്നതിന് മുമ്പ് ജനലുകള് തുറന്ന് വായുസഞ്ചാരം ഉറപ്പാക്കുകയും എയര് കണ്ടീഷന് സംവിധാനം പ്രവര്ത്തിപ്പിച്ച് വാഹനത്തിന്റെ ഉള്ഭാഗത്തെ താപനില കുറയ്ക്കുകയും ചെയ്യണമെന്ന് നിര്ദേശമുണ്ട്.
കുട്ടികളെയോ വളര്ത്തുമൃഗങ്ങളെയോ പാര്ക്ക് ചെയ്ത വാഹനങ്ങളില് ഒരു സാഹചര്യത്തിലും തനിച്ചാക്കരുതെന്നും അധികൃതര് ഓര്മിപ്പിച്ചു. രാജ്യത്തിന്റെ വിവിധ ഭാഗങ്ങളില് ഹീറ്റ് ഹെല്ത്ത് അലര്ട്ടുകള് നിലനില്ക്കുന്ന സാഹചര്യത്തില് പ്രധാനമായും ആവശ്യമായ വെള്ളം കൈവശം വയ്ക്കുകയും ദീര്ഘയാത്രകള്ക്ക് മുന്പ് വാഹനത്തിന്റെ അവസ്ഥ പരിശോധിക്കുകയും ചെയ്യണമെന്ന് വിദഗ്ധര് നിര്ദേശിച്ചു.
