മുന്‍ ടോറി മന്ത്രി ആന്‍ വൈഡ്‌കോംബ് വീട്ടില്‍ കൊല്ലപ്പെട്ട സംഭവം; 28-കാരനായ പ്രതി അറസ്റ്റില്‍
മുന്‍ കണ്‍സര്‍വേറ്റീവ് മന്ത്രി വീട്ടില്‍ കൊല്ലപ്പെട്ട സംഭവത്തില്‍ പ്രതിയെന്ന് സംശയിക്കുന്ന 28-കാരന്‍ അറസ്റ്റില്‍. 78-കാരിയായ ആന്‍ വൈഡ്‌കോംബിനെ വീട്ടില്‍ കൊല്ലപ്പെട്ട കേസിലാണ് അറസ്റ്റ്. വ്യാഴാഴ്ച ഡാര്‍ട്മൂറിലെ ഹെയ്തറിലുള്ള വീട്ടിലാണ് ഇവരുടെ മൃതദേഹം കണ്ടെത്തിയത്.
ബുധനാഴ്ച അക്രമിക്കപ്പെട്ട വൈഡ്‌കോംബിന്റെ മൃതദേഹം 24 മണിക്കൂറിന് ശേഷമാണ് കണ്ടെത്തിയതെന്നാണ് പോലീസ് വിശ്വസിക്കുന്നത്. സൗത്ത് യോര്‍ക്ക്ഷയറില്‍ നിന്നുമാണ് 28-കാരനെ അറസ്റ്റ് ചെയ്തതെന്ന് പോലീസ് വ്യക്തമാക്കി. ബ്രിട്ടീഷ് പൗരനായ വെള്ളക്കാരനാണ് കസ്റ്റഡിയിലുള്ളത്.
കേസില്‍ കൗണ്ടര്‍ ടെററിസം പോലീസിംഗ് നോര്‍ത്ത് ഈസ്റ്റ് വിഭാഗവും സഹകരിക്കുന്നുണ്ട്. എന്നിരുന്നാലും കേസിന് തീവ്രവാദ ബന്ധമുള്ളതായി നിലവില്‍ വിവരങ്ങള്‍ ലഭിച്ചിട്ടില്ല. കൊലപാതകം നടന്നതിന് പിന്നാലെ ആദ്യം ഒരു 26 വയസ്സുകാരനെ പോലീസ് അറസ്റ്റ് ചെയ്തിരുന്നു. എന്നാല്‍ ഇയാള്‍ക്ക് കേസുമായി ബന്ധമില്ലെന്ന് കണ്ട് വിട്ടയച്ചു.
