മിഡില്‍ ഈസ്റ്റ് സംഘര്‍ഷങ്ങള്‍ വീണ്ടും കടുത്തതോടെ ഇന്ധവില കയറുകയാണ്. ഇത് പലിശ നിരക്കിനെ ബാധിക്കുന്ന സ്ഥിതിയാണ്. ഇത് മോര്‍ട്ട്‌ഗേജ് വിപണിയെ അനിശ്ചിതത്വത്തിലാക്കി. മിഡില്‍ ഈസ്റ്റ് സംഘര്‍ഷങ്ങള്‍ വീണ്ടും തലയുയര്‍ത്തിയതോടെ സമീപകാല ഭാവിയില്‍ അനിശ്ചിതാവസ്ഥ തുടുമെന്ന് ബാങ്ക് ഓഫ് ഇംഗ്ലണ്ട് ഗവര്‍ണര്‍ നല്‍കിയ മുന്നറിയിപ്പാണ് ആശങ്കയായി മാറുന്നത്.
ലോകത്തിന് ആശ്വാസമായി മാറിയ യുഎസ്-ഇറാന്‍ വെടിനിര്‍ത്തലിന് ആയുസ് തീരെ കുറവായിരുന്നു. കഴിഞ്ഞ ആഴ്ചയോടെ സ്ഥിതിഗതികള്‍ കൂടുതല്‍ മോശമായെന്ന് ബാങ്ക് ഗവര്‍ണര്‍ ആന്‍ഡ്രൂ ബെയ്‌ലി ട്രഷറി സെലക്ട് കമ്മിറ്റി മുന്‍പാകെ വ്യക്തമാക്കി.
മാസങ്ങള്‍ നീണ്ട യുദ്ധത്തിന് ശേഷം യുഎസും, ഇറാനും സാധാരണ നിലയിലേക്ക് മടങ്ങാന്‍ സമാധാന കരാര്‍ വഴിയൊരുക്കുമെന്ന പ്രതീക്ഷകള്‍ ഇപ്പോള്‍ അസ്തമിച്ച മട്ടാണ്. ഇതോടെ എണ്ണ വില വീണ്ടും ഉയരുകയാണ്. മാസത്തിന്റെ ആദ്യം 70 ഡോളറിലുണ്ടായിരുന്ന എണ്ണവില ഇപ്പോള്‍ 87 ഡോളര്‍ കടന്നു. 160 ഡോളര്‍ വരെ വില ഉയരാമെന്നാണ് ഇക്കണോമിസ്റ്റുകള്‍ ഭയക്കുന്നത്.
എനര്‍ജി വില വീണ്ടും ഉയരുന്നത് പണപ്പെരുപ്പം ഉയരാന്‍ ഇടയാക്കും. ഇത് യുകെ വിപണിയില്‍ സാരമായി പ്രതിഫലിക്കുകയും ചെയ്യും. പണപ്പെരുപ്പം നിയന്ത്രിക്കാന്‍ കേന്ദ്ര ബാങ്ക് പലിശ നിരക്ക് വര്‍ദ്ധിപ്പിക്കുക കൂടി ചെയ്താല്‍ മോര്‍ട്ട്‌ഗേജ് വിപണിയില്‍ ഡീലുകളുടെ നിരക്കും ഉയരും. യുദ്ധം ആരംഭിച്ചത് മുതല്‍ ചെറിയ തോതില്‍ മോര്‍ട്ട്‌ഗേജ് ഡീല്‍ നിരക്കുകള്‍ വര്‍ദ്ധിച്ചിരുന്നു.
