പശ്ചിമ ലണ്ടനിലെ ഹെയ്സില് ഇന്ത്യന് യുവതി വീടിനുള്ളില് കുത്തേറ്റ് കൊല്ലപ്പെട്ട സംഭവത്തില് പ്രതിയെ പൊലീസ് അറസ്റ്റ് ചെയ്തു. ഡാനിയല് ഷോണ് ജെയിംസ് (44) ആണ് അറസ്റ്റിലായിരിക്കുന്നത്. പ്രതിയെ വില്സ്ഡന് മജിസ്ട്രേറ്റ് കോടതിയില് ഹാജരാക്കി. ഞായറാഴ്ച പുലര്ച്ചെയാണ് 24-കാരിയായ കിരണ്ദീപ് കൗര് സ്വന്തം വീട്ടില് കൊല്ലപ്പെട്ടത്. വീട്ടില് അതിക്രമിച്ച് കയറിയ അക്രമി ഉറങ്ങിക്കിടന്നിരുന്ന യുവതിയെ മൂര്ച്ചയുള്ള ആയുധം ഉപയോഗിച്ച് ആക്രമിക്കുകയായിരുന്നുവെന്നാണ് മെട്രോപൊളിറ്റന് പൊലീസിന്റെ പ്രാഥമിക കണ്ടെത്തല്. ഗുരുതരമായി പരിക്കേറ്റ കിരണ്ദീപ് സംഭവസ്ഥലത്തുവച്ചുതന്നെ മരിച്ചു.
ആക്രമണത്തില് യുവതിയുടെ ഭര്ത്താവിനും പരിക്കേറ്റിട്ടുണ്ട്. ആശുപത്രിയില് ചികിത്സയില് കഴിയുന്ന അദ്ദേഹത്തിന്റെ ആരോഗ്യനില സംബന്ധിച്ച കൂടുതല് വിവരങ്ങള് പൊലീസ് പുറത്തുവിട്ടിട്ടില്ല. ദമ്പതികള്ക്ക് ഏതാനും ആഴ്ചകള്ക്ക് മുമ്പ് ജനിച്ച നവജാത ശിശുവിന്റെ ആരോഗ്യനിലയെക്കുറിച്ചും വിവരങ്ങള് പുറത്തുവിട്ടിട്ടില്ല.
അതേസമയം, കിരണ്ദീപ് കൗറിന്റെ കുടുംബം സംഭവം വര്ഗീയ വിദ്വേഷത്തിന്റെ അടിസ്ഥാനത്തില് നടന്നതാണെന്ന് ആരോപിച്ചു. എന്നാല് ഇത്തരമൊരു ആരോപണം സ്ഥിരീകരിക്കുന്ന തെളിവുകള് ഇതുവരെ ലഭിച്ചിട്ടില്ലെന്നും എല്ലാ സാധ്യതകളും പരിശോധിച്ചാണ് അന്വേഷണം പുരോഗമിക്കുന്നതെന്നും മെട്രോപൊളിറ്റന് പൊലീസ് അറിയിച്ചു.
