യുകെയില്‍ പരിശീലനം നേടി നഴ്‌സിംഗ് ആന്‍ഡ് മിഡൈ്വഫറി കൗണ്‍സിലില്‍ (എന്‍ എം സി) റെജിസ്റ്റര്‍ ചെയ്യുന്നവരുടെ എണ്ണം കഴിഞ്ഞ കഴിഞ്ഞ വര്‍ഷം വലിയ തോതില്‍ കുറഞ്ഞു. കഴിഞ്ഞ വര്‍ഷം നഴ്‌സുമാരും, മിഡൈ്വഫുമാരും, നഴ്‌സിംഗ് അസിസ്സന്റുമാരുമായി 8,67,935 പേര് റെജിസ്റ്റര്‍ ചെയ്‌തെങ്കിലും വളര്‍ച്ചാ നിരക്ക് ഏകദേശം പകുതിയായി കുറഞ്ഞു എന്നാണ് കണക്കുകള്‍ വ്യക്തമാക്കുന്നത്. 2026 മാര്‍ച്ചില്‍ അവസാനിച്ച ഒരു വര്‍ഷക്കാലത്ത് റെജിസ്റ്റര്‍ ചെയ്യുന്ന വിദേശ - സ്വദേശ നഴ്‌സുമാരുടെയും മിഡൈ്വഫുമാരുടെയും എണ്ണത്തില്‍ കുറവുണ്ടായത് പരിശോധിക്കുമെന്ന് നഴ്‌സിംഗ് റെഗുലേറ്റര്‍ അറിയിച്ചു.
റിപ്പോര്‍ട്ടില്‍ എന്‍ എം സി പറയുന്നത് 2015 ഏപ്രില്‍ മുതല്‍ 2026 മാര്‍ച്ച് വരെയുള്ള ഒരു വര്‍ഷക്കാലയളവില്‍ റെജിസ്റ്റര്‍ ചെയ്തവരുടെ എണ്ണത്തില്‍ മുന്‍ വര്‍ഷത്തേക്കാള്‍ 1.7 ശതമാനം വര്‍ദ്ധനവുണ്ടായി എന്നാണ്. അതേസമയം 2024 ഏപ്രില്‍ മുതല്‍ 2025 മാര്‍ച്ച് വരെയുള്ള കാലയളവില്‍ റെജിസ്റ്റര്‍ ചെയ്തവരുടെ എണ്ണത്തില്‍ അതിനു തൊട്ടുമുന്‍പുള്ള വര്‍ഷത്തേക്കാള്‍ 3.3 ശതമാനത്തിന്റെ വര്‍ദ്ധനവായിരുന്നു ഉണ്ടായത്. വിദേശ നഴ്‌സുമാരുടെയും മിഡൈ്വഫുമാരുടെയും വരവ് കുറഞ്ഞതാണ് ഇതിന് പ്രധാന കാരണമായി ചൂണ്ടിക്കാട്ടുന്നത്.
അതേസമയം, ബ്രിട്ടനില്‍ പരിശീലനം നേടിയ നഴ്‌സുമാരുടേയും മിഡൈ്വഫുമാരുടെയും എണ്ണത്തില്‍ 4.9 ശതമാനത്തിന്റെ കുറവുണ്ടായതായും റിപ്പോര്‍ട്ടില്‍ പറയുന്നു. 2026 മാര്‍ച്ച് വരെയുള്ള ഒരുവര്‍ഷ കാലയളവില്‍ ബ്രിട്ടനില്‍ പരിശീലനം നേടിയ 30,151 പേരാണ് റെജിസ്റ്റര്‍ ചെയ്തതെങ്കില്‍ തൊട്ട് മുന്‍പത്തെ വര്‍ഷം അത് 32,164 ആയിരുന്നു എന്നും റിപ്പോര്‍ട്ടില്‍ പറയുന്നു. കഴിഞ്ഞ അഞ്ചു വര്‍ഷക്കാലത്തിനിടയില്‍ ഇതാദ്യമായാണ് ബ്രിട്ടനില്‍ പഠനവും പരിശീലനവും പൂര്‍ത്തിയാക്കി, എന്‍ എം സിയില്‍ റെജിസ്റ്റര്‍ ചെയ്യുന്നവരുടെ എണ്ണത്തില്‍ കുറവുണ്ടാകുന്നതെന്ന് റോയല്‍ കോളേജ് ഓഫ് നഴ്‌സിംഗിന്റെ വിശകലന റിപ്പോര്‍ട്ടില്‍ ചൂണ്ടിക്കാട്ടുന്നു.
മേഖല വിടുന്ന പ്രൊഫഷണലുകളുടെ എണ്ണത്തിലും വര്‍ദ്ധനവുണ്ടായിട്ടുണ്ട്. 41,542 പേര് അധികമായി റെജിസ്റ്ററില്‍ വന്നെങ്കിലും, 30,323 പ്രൊഫഷണലുകള്‍ കഴിഞ്ഞ വര്‍ഷം റെജിസ്റ്ററില്‍ നിന്നും പുറത്തുപോയിട്ടുണ്ട്. കഴിഞ്ഞ വര്‍ഷം റെജിസ്റ്ററില്‍ നിന്നും പുറത്തുപോയവരുടെ എണ്ണവുമായി താരതമ്യം ചെയ്താല്‍ 5.3 ശതമാനത്തിന്റെ വര്‍ദ്ധനവാണ് ഇക്കാര്യത്തില്‍ ഉണ്ടായിരിക്കുന്നത്.
റെജിസ്റ്റര്‍ വിട്ടുപോയവരില്‍ 25,094 പേര് ബ്രിട്ടനില്‍ പഠനവും പരിശീലനവും നടത്തിയവരാണ്. അതേസമയം, റെജിസ്റ്ററില്‍ നിന്നും വിട്ടുപോകുന്ന വിദേശ പ്രൊഫഷണലുകളുടെ എണ്ണത്തില്‍ കഴിഞ്ഞ വര്‍ഷം, മുന്‍ വര്‍ഷത്തെ അപേക്ഷിച്ച് ഉണ്ടായത് 0.9 ശതമാനം വര്‍ദ്ധനവ് മാത്രമാണെന്നും കണക്കുകള്‍ വ്യക്തമാക്കുന്നു.
