ലണ്ടന്‍: വേനലവധി കൂടുതല്‍ ആഘോഷമാക്കാന്‍ ഇംഗ്ലണ്ടിലെ കുട്ടികള്‍ക്ക് ആഗസ്റ്റ് മാസം മുഴുവന്‍ സൗജന്യ ബസ് യാത്ര. സ്‌കൂള്‍ വേനലവധിക്കാലത്ത് കുടുംബങ്ങള്‍ക്ക് മേല്‍ ഉണ്ടാകുന്ന സാമ്പത്തിക സമ്മര്‍ദ്ദം കുറച്ചെങ്കിലും കുറയ്ക്കുക എന്ന ഉദ്ദേശ്യത്തോടെ നടപ്പിലാക്കിയിരിക്കുന്ന പദ്ധതിയാണിത്. ആഗസ്റ്റ് മാസം മുഴുവന്‍, ലോക്കല്‍ ബസ്സുകളില്‍ 16 വയസ്സില്‍ താഴെയുള്ള ഒട്ടുമിക്ക കുട്ടികള്‍ക്കും പണം നല്‍കേണ്ടി വരില്ലെന്ന് ഗതാഗത വകുപ്പ് വ്യക്തമാക്കിയിട്ടുണ്ട്.
സൗജന്യ യാത്രവഴി എത്തിച്ചേരാവുന്ന സ്ഥലങ്ങളുടെ പട്ടിക ഇതിനോടകം തന്നെ ഗതാഗത വകുപ്പ് തയ്യാറാക്കിയിട്ടുണ്ട്. യോര്‍ക്ക് ഡണ്‍ഗിയോണ്‍, വിന്‍ഡ്‌സര്‍ കാസില്‍, ലെസ്റ്ററിലെ നാഷണല്‍ സ്‌പേസ് സെന്റര്‍ എന്നിവ ഇതില്‍ ഉള്‍പ്പെടുന്നു. നിലവില്‍ 5 മുതല്‍ 15 വയസ്സുവരെയുള്ള കുട്ടികള്‍ക്ക് ഈടാക്കുന്ന ബസ്സ് ചാര്‍ജ്ജ് 1 മുതല്‍ 2 പൗണ്ട് വരെയാണ്. അഞ്ച് വയസ്സില്‍ താഴെയുള്ള കുട്ടികള്‍ക്ക് ഇപ്പോള്‍ തന്നെ ബസ്സ് യാത്ര സൗജന്യമാണ്. കോസ്റ്റ് ഓഫ് ലിവിംഗ് പ്രതിസന്ധി പല കുടുംബങ്ങളുടെയും അവധി ആഘോഷങ്ങള്‍ക്ക് മേല്‍ കരിനിഴല്‍ വിഴ്ത്താതിരിക്കാനുള്ള ഒരു കരുതല്‍ ശ്രമമാണിതെന്നും ഗതാഗത വകുപ്പ് വ്യക്തമാക്കിയിട്ടുണ്ട്.
