സഹപ്രവര്‍ത്തകയെ ലിഫ്റ്റിനുള്ളില്‍ പീഡിപ്പിച്ച കേസ്; തരുണ്‍ തേജ്പാലിന് 10 വര്‍ഷം കഠിനതടവ് വിധിച്ച് ബോംബെ ഹൈക്കോടതി
സഹപ്രവര്‍ത്തകയെ ലിഫ്റ്റിനുള്ളില്‍ വെച്ച് പീഡിപ്പിച്ച കേസില്‍ തെഹല്‍ക്ക സ്ഥാപകന്‍ തരുണ്‍ തേജ്പാലിന് പത്ത് വര്‍ഷം കഠിനതടവ്. പത്ത് വര്‍ഷത്തെ കഠിനതടവാണ് ബോംബെ ഹൈക്കോടതിയുടെ ഗോവ ബെഞ്ച് വിധിച്ചത്. 2021ല്‍ തരുണ്‍ തേജ്പാലിനെ കുറ്റവിമുക്തനാക്കിക്കൊണ്ടുള്ള ഗോവ വിചാരണക്കോടതി വിധിയും ഹൈക്കോടതി റദ്ദാക്കി. രണ്ടാഴ്ച്‌ചയ്ക്കുളില്‍ തരുണ്‍ പൊലീസിന് മുന്നില്‍ കീഴടങ്ങണമെന്നും കോടതി നിര്‍ദേശമുണ്ട്.
ജസ്റ്റിസുമാരായ ഡോ. നീല ഗോഖലെ, അമിത് ജംസന്ദേക്കര്‍ എന്നിവരടങ്ങിയ ഡിവിഷന്‍ ബെഞ്ചിന്റേതാണ് ഉത്തരവ്. വിചാരണക്കോടതി വിധിക്കെതിരെ ഗോവന്‍ സര്‍ക്കാരാണ് ബോംബെ ഹൈക്കോടതിയെ സമീപിച്ചത്. സംസ്ഥാന സര്‍ക്കാരിന് വേണ്ടി സോളിസിറ്റര്‍ ജനറല്‍ തുഷാര്‍ മേത്തയാണ് ഹാജരായത്. മുതിര്‍ന്ന അഭിഭാഷകന്‍ അബാദ് പോണ്ട തേജ്‌പാലിനുവേണ്ടി ഹാജരായി.
2013 നവംബറില്‍ ഗോവയില്‍ നടന്ന 'തിങ്ക്ഫെസ്റ്റ്' പരിപാടിക്കിടെ തേജ്പാല് ഹോട്ടലിലെ ലിഫ്റ്റിനുള്ളില്‍ വച്ച് ലൈംഗികമായി പീഡിപ്പിച്ചെന്നാണ് സഹപ്രവര്‍ത്തകയുടെ പരാതി. കേസില്‍ അന്വേഷണം പൂര്‍ത്തിയാക്കി 2017 ല്‍ ആണ് വിചാരണ ആരംഭിച്ചത്. 2021ല്‍ തരുണ്‍ തേജ്പാല് കുറ്റക്കാരനല്ലെന്ന് കോടതി കണ്ടെത്തി. എന്നാല്‍ ഈ വിധിക്കെതിരെ സംസ്ഥാന സര്‍ക്കാര്‍ അപ്പീലുമായി ഹൈക്കോടതിയെ സമീപിക്കുകയായിരുന്നു.
