കാസര്‍കോട്: വിഡിയോ കോള്‍ വിളിച്ചതിനു ശേഷം പ്രതിശ്രുത വധു ജീവനൊടുക്കിയതിനു പിന്നാലെ പ്രതിശ്രുത വരനും ജീവനൊടുക്കി. കാസര്‍കോട് പൂച്ചക്കാട് കിഴക്കേകരയിലെ പി. അനുശ്രീയാണ് (25) താമസസ്ഥലത്ത് ജീവനൊടുക്കിയത്. വിഡിയോ കോള്‍ വിളിച്ചശേഷമായിരുന്നു ആത്മഹത്യ. ഇതിനു പിന്നാലെയാണ്, പ്രതിശ്രുത വരനായ കണ്ണൂര്‍ ഇരിട്ടി വിളമന അമ്പലത്തട്ട് സ്വദേശി അമല്‍ (27) ആത്മഹത്യ ചെയ്തത്. രണ്ടു പേരും ബാങ്ക് ജീവനക്കാരായിരുന്നു. ഡിസംബര്‍ 26നായിരുന്നു വിവാഹം ഉറപ്പിച്ചിരുന്നത്.
ഗ്യാസ് ഏജന്‍സി ഉടമ തയ്യില്‍ വീട്ടില്‍ കെ.ചന്ദ്രന്റെയും റീനയുടെയും മകളായ അനുശ്രീ മൈസൂരിലെ എസ്ബിഐ ഹുന്‍സൂര്‍ ശാഖയിലെ ജീവനക്കാരിയായിരുന്നു. മരണകാരണം അറിവായിട്ടില്ല. സഹോദരി: പി.ശ്രീലക്ഷ്മി. അനുശ്രീയുടെ മൃതദേഹം ഹുന്‍സൂരില്‍നിന്ന് പോസ്റ്റുമോര്‍ട്ടത്തിനുശേഷം പൂച്ചക്കാട്ടെ വീട്ടിലെത്തിച്ച് സംസ്കരിച്ചു. എറണാകുളത്തെ ഹോട്ടല്‍ മുറിയിലാണ് അമല്‍ ആത്മഹത്യ ചെയ്തത്. അമലിന്റെ ബന്ധുക്കള്‍ കൊച്ചിയില്‍ എത്തിയ ശേഷം ആയിരിക്കും തുടര്‍ നടപടികള്‍.
