യുകെയില്‍ സാല്‍മൊണെല്ല ഭക്ഷ്യവിഷബാധ വ്യാപിക്കുന്ന സാഹചര്യത്തില്‍ പുറത്തുനിന്ന് ഭക്ഷണം കഴിക്കുന്നവര്‍ക്ക് മുന്നറിയിപ്പുമായി ഫുഡ് സ്റ്റാന്‍ഡേര്‍ഡ്‌സ് ഏജന്‍സി. ഹോട്ടലുകള്‍, റസ്റ്ററന്റുകള്‍, കഫേകള്‍ എന്നിവിടങ്ങളില്‍ നിന്ന് ഭക്ഷണം കഴിക്കുന്നവര്‍ക്ക്, പ്രത്യേകിച്ച് അപകടസാധ്യത കൂടുതലുള്ളവര്‍ പാതി പാകം ചെയ്തതോ ദ്രവരൂപത്തിലുള്ള മഞ്ഞയോടുകൂടിയതോ ആയ മുട്ടകള്‍ കഴിക്കരുതെന്നാണ് നിര്‍ദേശം.
അഞ്ച് വയസ്സിന് താഴെയുള്ള കുട്ടികള്‍, 65 വയസ്സിന് മുകളിലുള്ളവര്‍, ഗര്‍ഭിണികള്‍, ആരോഗ്യപ്രശ്‌നങ്ങളുള്ളവര്‍ എന്നിവര്‍ പ്രത്യേകം ജാഗ്രത പാലിക്കണം. മുട്ട പാകം ചെയ്യാതെ തയ്യാറാക്കുന്ന മയോണൈസ്, സഫ്‌ലേ, ഹോളണ്ടൈസ് സോസ് തുടങ്ങിയ പുതുതായി തയ്യാറാക്കിയ ഭക്ഷണങ്ങളും ഇവര്‍ ഒഴിവാക്കണമെന്ന് എഫ്എസ്എ അറിയിച്ചു.
എന്നാല്‍ മുട്ട നന്നായി വേവിച്ച ഭക്ഷണങ്ങള്‍ റസ്റ്ററന്റുകളിലും കഫേകളിലും ടേക്ക്അവേകളിലും നിന്ന് കഴിക്കുന്നത് സുരക്ഷിതമാണെന്ന് അധികൃതര്‍ വ്യക്തമാക്കി.
ഒരു മരണം ഉള്‍പ്പെടെ നൂറുകണക്കിന് പേര്‍ക്ക് രോഗബാധ റിപ്പോര്‍ട്ട് ചെയ്തതിനെ തുടര്‍ന്ന് യുകെ ഹെല്‍ത്ത് സെക്യൂരിറ്റി ഏജന്‍സി രാജ്യവ്യാപക സാല്‍മൊണെല്ല ഭക്ഷ്യവിഷബാധ വ്യാപനം പ്രഖ്യാപിച്ചിരുന്നു. ഇറക്കുമതി ചെയ്ത മുട്ടകളോ അവ ഉപയോഗിച്ചുള്ള ഭക്ഷണങ്ങളോ ആണ് വ്യാപനത്തിന് പിന്നിലെന്നാണ് പ്രാഥമിക നിഗമനം.
