കാലാവസ്ഥ പ്രവചനം ശരിവച്ചു ബ്രിട്ടനില്‍ കനത്ത മഴയില്‍ പലയിടങ്ങളിലും വെള്ളം പൊങ്ങി. റോഡുകള്‍ നദികളായി മാറിയപ്പോള്‍ പല പ്രദേശങ്ങളിലും വീടുകള്‍ക്കുള്ളിലും വെള്ളം കയറിയതായി റിപ്പോര്‍ട്ടുകളുണ്ട്. പേമാരിക്കുള്ള ഒരു പുതിയ മുന്നറിയിപ്പുകൂടി ഈ സാഹചര്യത്തില്‍ മെറ്റ് ഓഫീസ് പുറപ്പെടുവിച്ചിട്ടുണ്ട്. ടെയിം വാലി കനാലിനു സമീപം വെള്ളപ്പൊക്കം രൂക്ഷമായതോടെ മുപ്പത്തി രണ്ടോളം കെട്ടിടങ്ങള്‍ക്കാണ് നാശനഷ്ടങ്ങള്‍ സംഭവിച്ചത്. ബര്‍മിങാമിലെ തോണ്‍ബ്രിഡ്ജ് അവന്യുവിലും ഹാഡണ്‍ റോഡിലും രക്ഷാപ്രവര്‍ത്തനങ്ങള്‍ക്കായി ഏഴോളം ഫയര്‍ എഞ്ചിനുകളാണ് എത്തിയത്.
ഒരു മണിക്കൂര്‍ സമയത്ത് ഏഴ് ഇഞ്ചോളം മഴ പെയ്തിറങ്ങിയ വെസ്റ്റ് മിഡ്‌ലാന്‍ഡ്‌സില്‍ അഗ്‌നിശമന സേനാംഗങ്ങള്‍ വീടുകളില്‍ കുടുങ്ങിപ്പോയവരെ രക്ഷിക്കാനെത്തി. കടുത്ത ചൂടിനൊടുവില്‍ എത്തിയ പ്രളയം ബര്‍മിംഗ്‌ഹാമിനെ ഏറെ വലച്ചതായി റിപ്പോര്‍ട്ടുകള്‍ സൂചിപ്പിക്കുന്നു. പലയിടങ്ങളിലും റോഡുകള്‍ വെള്ളത്തിനടിയിലായപ്പോള്‍ ജനങ്ങള്‍ ജീവന്‍ രക്ഷിക്കാനായി നെട്ടോട്ടമോടുകയായിരുന്നു. പകുതി മുങ്ങിയ കാറുകളുടെയും, കാറുകളില്‍ നിന്നും വീടുകളില്‍ നിന്നും പുറത്തിറങ്ങാന്‍ തത്രപ്പെടുന്ന പ്രദേശവാസികളുടെയും ചിത്രങ്ങള്‍ പുറത്തു വന്നിട്ടുണ്ട്.
കിഴക്കന്‍ ഇംഗ്ലണ്ടില്‍ മറ്റൊരു പേമാരി മുന്നറിയിപ്പ് നിലവില്‍ വന്നു. മുന്നറിയിപ്പ് ഇന്ന് വൈകിട്ട് അഞ്ചു മണിവരെ നിലവിലുണ്ടാകും. അതിതീവ്ര കാലാവസ്ഥ മൂലം ബ്രിട്ടനില്‍ അങ്ങോളമിങ്ങോളമുള്ള തീം പാര്‍ക്കുകള്‍ അടച്ചിടേണ്ടതായി വന്നു. കര്‍ബര്‍ റോഡിലെ ഫര്‍ണീച്ചറുകള്‍ ഉള്‍പ്പടെയുള്ളവ വെള്ളത്തില്‍ മുങ്ങി ഉപയോഗയോഗ്യമല്ലാതെയായി.
