ലണ്ടനില്‍ എയര്‍ ട്രാഫിക് കണ്‍ട്രോള്‍ ദാതാവായ എന്‍എടിഎസിന്റെ ഫ്‌ലൈറ്റ് ഡാറ്റ പ്രോസസ്സിംഗ് സിസ്റ്റത്തിലുണ്ടായ സാങ്കേതിക തകരാറിനെ തുടര്‍ന്ന് യുകെയിലുടനീളം വന്‍ യാത്രാപ്രതിസന്ധി. ബ്രിട്ടീഷ് വിമാനത്താവളങ്ങളിലേക്കും തിരിച്ചുമുള്ള ഏകദേശം 1,300-ഓളം വിമാനങ്ങള്‍ റദ്ദാക്കിയതായി ഫ്‌ലൈറ്റ് റാഡാര്‍ 24 വ്യക്തമാക്കി. ഹീത്രൂ, ഗാറ്റ്വിക്ക്, മാഞ്ചസ്റ്റര്‍, ലിവര്‍പൂള്‍, ബര്‍മിംഗ്ഹാം, എഡിന്‍ബര്‍ഗ് തുടങ്ങിയ പ്രധാന വിമാനത്താവളങ്ങളെയും അയര്‍ലണ്ടിലെ ഡബ്ലിന്‍ വിമാനത്താവളത്തെയും ഈ പ്രതിസന്ധി സാരമായി ബാധിച്ചു.
ചൊവ്വാഴ്ച വൈകുന്നേരത്തോടെ പ്രശ്‌നം പരിഹരിച്ചതായി NATS അറിയിച്ചെങ്കിലും, സര്‍വീസുകള്‍ പൂര്‍വ്വസ്ഥിതിയിലാക്കാന്‍ കൂടുതല്‍ സമയമെടുക്കുമെന്നും കമ്പനി വ്യക്തമാക്കി. യുകെയിലെ ഏറ്റവും തിരക്കേറിയ വിമാനത്താവളമായ ഹീത്രോ ചൊവ്വാഴ്ച ബാക്കിയുള്ള സമയത്തേക്ക് എത്തിച്ചേരലുകള്‍ നിര്‍ത്തിവെക്കുകയും പുറപ്പെടലുകള്‍ പുനരാരംഭിക്കുകയും ചെയ്തു. ബ്രിട്ടീഷ് എയര്‍വേയ്സ്, റയാന്‍എയര്‍, ഈസിജെറ്റ്, കെഎല്‍എം, യൂറോവിംഗ്സ് തുടങ്ങിയ പ്രമുഖ വിമാനക്കമ്പനികളുടെ നൂറുകണക്കിന് സര്‍വീസുകളാണ് റദ്ദാക്കുകയോ വഴിതിരിച്ചുവിടുകയോ ചെയ്തത്. ബുധനാഴ്ചയും ലണ്ടനില്‍ നിരവധി സര്‍വീസുകള്‍ റദ്ദാക്കപ്പെട്ടിട്ടുണ്ട്. വിമാനങ്ങളും ജീവനക്കാരും കൃത്യസമയത്ത് എത്താത്തത് യാത്രാനീക്കങ്ങളെ ഗുരുതരമായി ബാധിച്ചിട്ടുണ്ടെന്നും, യാത്രക്കാര്‍ വിമാന നില പരിശോധിച്ച ശേഷംമാത്രമെ യാത്ര തിരിക്കാവൂ എന്നും എയര്‍ ഇന്ത്യ ഉള്‍പ്പെടെയുള്ള കമ്പനികള്‍ മുന്നറിയിപ്പ് നല്‍കിയിട്ടുണ്ട്. നാപോളിക്കെതിരായ മത്സരത്തിനായി പോകേണ്ടിയിരുന്ന ചാമ്പ്യന്‍സ് ലീഗ് ടീമിന്റെ യാത്രയും വിമാനം വൈകിയതിനെ തുടര്‍ന്ന് തടസ്സപ്പെട്ടു.
കഴിഞ്ഞ വര്‍ഷങ്ങളിലുണ്ടായ സമാനമായ സാങ്കേതിക തകരാറുകള്‍ ബ്രിട്ടന്റെ വ്യോമയാന അടിസ്ഥാന സൗകര്യങ്ങളുടെ സുരക്ഷയെയും വിശ്വാസ്യതയെയും കുറിച്ചുള്ള കടുത്ത ആശങ്കകള്‍ക്ക് വീണ്ടും വഴിവെച്ചിട്ടുണ്ട്. NATS മേധാവി മാര്‍ട്ടിന്‍ റോള്‍ഫ് രാജിവെക്കണമെന്നും സര്‍ക്കാരിന്റെ അടിയന്തര ഇടപെടല്‍ വേണമെന്നും റയാനെയറും വിസ് എയറും ഉള്‍പ്പെടെയുള്ള കമ്പനികള്‍ ആവശ്യപ്പെട്ടു. എന്താണ് യഥാര്‍ത്ഥത്തില്‍ സംഭവിച്ചതെന്ന് ഇതുവരെ വ്യക്തമല്ലെന്നും സംഭവത്തെക്കുറിച്ച് സമഗ്രമായ അന്വേഷണം നടത്തുമെന്ന് ഗതാഗത സെക്രട്ടറി ഹെയ്ഡി അലക്‌സാണ്ടറും സിവില്‍ ഏവിയേഷന്‍ അതോറിറ്റിയും അറിയിച്ചു.
പ്രതിസന്ധിയുടെ ഭാഗമായി എയര്‍ ഇന്ത്യയുടെ ഇന്ത്യ-യുകെ സര്‍വീസുകളെയും ബാധിച്ചു. മുംബൈയില്‍ നിന്ന് ലണ്ടനിലേക്ക് പുറപ്പെട്ട എയര്‍ ഇന്ത്യയുടെ AI131 വിമാനം സാങ്കേതിക പ്രശ്‌നത്തെ തുടര്‍ന്ന് വഴിതിരിച്ച് സൂറിച്ചില്‍ ഇറക്കി. എയര്‍ ഇന്ത്യയുടെ മറ്റ് ചില സര്‍വീസുകള്‍ വൈകുകയും റദ്ദാക്കുകയും ചെയ്തിട്ടുണ്ട്.
യുകെയിലേക്കും തിരിച്ചുമുള്ള യാത്രക്കാര്‍ക്ക് വിമാനത്താവളത്തിലേക്ക് പുറപ്പെടുന്നതിന് മുമ്പ് തങ്ങളുടെ സര്‍വീസിന്റെ ഏറ്റവും പുതിയ സ്റ്റാറ്റസ് വിമാനക്കമ്പനിയുടെ ഔദ്യോഗിക ചാനലുകളില്‍ പരിശോധിക്കണമെന്ന് അധികൃതര്‍ നിര്‍ദേശിച്ചു.
