നേരത്തെയുള്ള തിരഞ്ഞെടുപ്പ് പ്രഖ്യാപനം ഉപേക്ഷിച്ച് ആന്‍ഡി ബേണ്‍ഹാം; അടുത്തത് 2029ല്‍
ബ്രിട്ടനില്‍ ഇടക്കാല പൊതുതെരഞ്ഞെടുപ്പ് നടത്തുമെന്ന അഭ്യൂഹങ്ങള്‍ക്ക് വിരാമമിട്ട് പ്രധാനമന്ത്രി ആന്‍ഡി ബേണ്‍ഹാം. അടുത്ത പൊതുതെരഞ്ഞെടുപ്പ് 2029ലായിരിക്കുമെന്ന് അദ്ദേഹം വ്യക്തമാക്കി.ലേബര്‍ പാര്‍ട്ടിയുടെ ജനപിന്തുണ അടുത്തിടെ മെച്ചപ്പെട്ടതിനെ തുടര്‍ന്ന് നേരത്തെയുള്ള തിരഞ്ഞെടുപ്പ് പ്രഖ്യാപിക്കാനുള്ള സാധ്യതയെക്കുറിച്ച് വെസ്റ്റ്മിന്‍സ്റ്ററില്‍ ചര്‍ച്ചകള്‍ സജീവമായിരുന്നു. ചില അഭിപ്രായ സര്‍വേകളില്‍ ലേബര്‍ മുന്നിലെത്തിയതും അഭ്യൂഹങ്ങള്‍ക്ക് കാരണമായി. എന്നാല്‍ സീറ്റ് കണക്കുകള്‍ അടിസ്ഥാനമാക്കിയുള്ള ചില സര്‍വേകള്‍ നേരത്തെയുള്ള തിരഞ്ഞെടുപ്പ് നടന്നാല്‍ ലേബറിന് നിലവിലെ ഭൂരിപക്ഷം നിലനിര്‍ത്താന്‍ കഴിയില്ലെന്നും സൂചിപ്പിച്ചിരുന്നു.
ലിവര്‍പൂളില്‍ ലേബര്‍ പാര്‍ട്ടിയുടെ വാര്‍ഷിക സമ്മേളനം ആരംഭിക്കാനിരിക്കെയാണ് ബേണ്‍ഹാമിന്റെ നിര്‍ണായക പ്രതികരണം. വെള്ളിയാഴ്ച പ്രാദേശിക മാധ്യമങ്ങള്‍ക്ക് നല്‍കിയ അഭിമുഖങ്ങളിലാണ് അദ്ദേഹം നേരത്തെയുള്ള തിരഞ്ഞെടുപ്പ് സാധ്യത തള്ളിയത്.
'നേരത്തെയുള്ള തിരഞ്ഞെടുപ്പിനെക്കുറിച്ചുള്ള എല്ലാ അഭ്യൂഹങ്ങള്‍ക്കും ഇവിടെ തന്നെ വിരാമമിടാം. അടുത്ത തിരഞ്ഞെടുപ്പ് 2029ലായിരിക്കും,' ബേണ്‍ഹാം പറഞ്ഞു. പുതിയ സര്‍ക്കാര്‍ അധികാരത്തിലെത്തിയതിനു പിന്നാലെ രാജ്യത്തെ പ്രശ്‌നങ്ങളില്‍ ശ്രദ്ധ കേന്ദ്രീകരിക്കുകയാണ് വേണ്ടതെന്നും അദ്ദേഹം വ്യക്തമാക്കി.
സെപ്റ്റംബര്‍ 10 മുതല്‍ 15 വരെ നടത്തിയ ഒരു സര്‍വേയില്‍ ലേബറിന് 27 ശതമാനം പിന്തുണയും റിഫോം യുകെയ്ക്ക് 23 ശതമാനവും കണ്‍സര്‍വേറ്റീവുകള്‍ക്ക് 21 ശതമാനവും ലഭിച്ചിരുന്നു.
