ദുബായില്‍ നിന്നും ലണ്ടനിലെ ഹീത്രൂ വിമാനത്താവളത്തിലേക്ക് പറന്ന എമിറേറ്റ്‌സിന്റെ എയര്‍ബസ് എ 380 വിമാനം അടിയന്തരമായി ഫ്രാങ്ക്ഫര്‍ട്ടിലേക്ക് വഴിതിരിച്ചു വിട്ടു. വ്യാഴാഴ്ച്ചയായിരുന്നു സംഭവം. അഞ്ഞൂറിലധികം സീറ്റുകളുള്ള, എയര്‍ബസ് എ 380 -800 ന്റെ ഇ കെ 31 വിമാനം ദുബായ് അന്താരാഷ്ട്ര വിമാനത്താവളത്തില്‍ നിന്നും പ്രാദേശിക സമയം രാവിലെ ഏഴര മണിക്കാണ് യാത്ര തിരിച്ചത്. ഏഴ് മണിക്കൂര്‍ 20 മിനിറ്റ് യാത്രയാണ് ഹീത്രൂവിലേക്കുള്ളത്.
യാത്ര ആരംഭിച്ച് ആറ് മണിക്കൂര്‍ കഴിഞ്ഞപ്പോള്‍, യൂറോപ്യന്‍ വ്യോമമേഖലയിലൂടെ 40,000 അടി ഉയരത്തില്‍ പറക്കവെ ആയിരുന്നു അടിയന്തര ലാന്‍ഡിംഗിനുള്ള കോഡ് സന്ദേശം വിമാനത്തില്‍ നിന്നും അയച്ചത്. അധികം താമസിയാതെ പറക്കുന്ന ഉയരത്തില്‍ നിന്നും താഴേക്ക് വന്ന ഡബിള്‍ ഡെക്കര്‍ വിമാനം ഫ്രാങ്ക്ഫര്‍ട്ട് എയര്‍പോര്‍ട്ടിലേക്ക് വഴി തിരിച്ചുവിടാന്‍ അനുമതി തേടുകയായിരുന്നു. ചില ഓപ്പറേഷണല്‍ കാരണങ്ങളാലായിരുന്നു ഇത് വേണ്ടിവന്നതെന്നാണ് എമിറേറ്റ്‌സ് പിന്നീട് വിശദീകരിച്ചത്. ഒരു യാത്രക്കാരനുമായി ബന്ധപ്പെട്ട മെഡിക്കല്‍ എമര്‍ജന്‍സിയായിരുന്നു വിമാനം വഴിതിരിച്ചു വിടാനും അടിയന്തരമായി നിലത്തിറക്കാനും കാരണമായത് എന്ന റിപ്പോര്‍ട്ടും വരുന്നുണ്ട്.
ഉച്ചയോടെ ഫ്രാങ്ക്ഫര്‍ട്ട് എയര്‍പോര്‍ട്ടിലെ 25L റണ്‍വേയില്‍ സുരക്ഷിതമായി ലാന്‍ഡ് ചെയ്ത വിമാനം, തുടര്‍ന്ന് വിദഗ്ധ പരിശോധനയ്ക്കായി പാര്‍ക്കിംഗ് ബേയിലേക്ക് മാറ്റി. അടിയന്തരമായി ഇറങ്ങിയ വിമാനത്തില്‍ ആവശ്യമായ വൈദ്യസഹായം ലഭ്യമാക്കുകയും, അസുഖ ബാധിതനായ യാത്രക്കാരനെ തുടര്‍ ചികിത്സയ്ക്കായി ആശുപത്രിയിലേക്ക് മാറ്റുകയും ചെയ്തു. തുടര്‍ന്ന് യാത്രക്കാരുടെ അസൗകര്യം ഒഴിവാക്കുന്നതിനായി അധികൃതര്‍ മറ്റൊരു യാത്രാക്രമീകരണം ഒരുക്കുകയും, ഫ്രാങ്ക്ഫര്‍ട്ടില്‍ നിന്ന് വൈകീട്ടോടെ വിമാനം ലണ്ടനിലേക്ക് യാത്ര തുടരുകയും ചെയ്തു.
