വിദേശ ജോലിക്കാര്‍ക്ക് വിസ കൊടുക്കാന്‍ അപേക്ഷിച്ച് മന്ത്രിമാര്‍
വിദേശ ജോലിക്കാരെ നിയന്ത്രിക്കുന്നതിന്റെ തിരിച്ചടി രൂക്ഷമാവുന്നു. തദ്ദേശീയരെ ഉപയോഗിച്ച് വേക്കന്‍സികള്‍ നിറയ്ക്കാന്‍ കഴിയാതെ പോകുന്നതിനാല്‍ വിദേശ ജോലിക്കാര്‍ വിസ അനുവദിക്കാന്‍ ആവശ്യപ്പെട്ട് ക്യാബിനറ്റ് മന്ത്രിമാര്‍ തനിക്ക് മുന്നില്‍ അപേക്ഷയുമായി എത്താറുണ്ടെന്ന് ഹോം സെക്രട്ടറിയുടെ വെളിപ്പെടുത്തല്‍.
ജോലിക്കാര്‍ക്ക് അടിയന്തര ക്ഷാമം നേരിടുമ്പോള്‍ വിദേശ ജീവനക്കാരെ കണ്ടെത്താന്‍ അനുമതി തേടി ലേബര്‍ ഗവണ്‍മെന്റിലെ ക്യാബിനറ്റ് മന്ത്രിമാര്‍ തനിക്ക് മുന്നിലേക്ക് എത്താറുണ്ടെന്ന് ഹോം സെക്രട്ടറി പറയുന്നു. ബ്രിട്ടനില്‍ നിലവിലുള്ള ജോലിക്കാരെ പരിശീലിപ്പിച്ച് എടുക്കുന്നതിന് പകരം വിവിധ വകുപ്പുകള്‍ കൂടുതല്‍ കുടിയേറ്റക്കാരെ എത്തിക്കുന്നതിനാണ് പ്രാധാന്യം നല്‍കുന്നതെന്ന് അവര്‍ കുറ്റപ്പെടുത്തി.
'വിവിധ വകുപ്പ് മന്ത്രിമാര്‍ ഓരോ ആഴ്ചയും വിസ നല്‍കാന്‍ അപേക്ഷയുമായി വരാറുണ്ട്. 10 വെല്‍ഡര്‍മാര്‍ക്ക് ഉള്ള വിസ ലഭ്യമാക്കണം എന്ന് തുടങ്ങുന്ന ആവശ്യങ്ങളാണ് വരാറുള്ളത്', മഹ്മൂദ് 'ദി റെസ്റ്റ് ഈസ് പൊളിറ്റിക്‌സ്' പോഡ്കാസ്റ്റില്‍ പറഞ്ഞു. 10 വെല്‍ഡര്‍മാരെ കിട്ടാന്‍ ബ്രിട്ടനില്‍ ഇത്ര ബുദ്ധിമുട്ടുണ്ടോയെന്ന് താന്‍ പലപ്പോഴും ചിന്തിക്കാറുണ്ടെന്നും അവര്‍ കൂട്ടിച്ചേര്‍ത്തു.
കാരണം എളുപ്പത്തില്‍ ചെയ്യാവുന്ന ഒരു ലിവറായി അത് മാറിയിരിക്കുന്നു. വളരെ ആവശ്യമുള്ളത് കൊണ്ടാണ് എന്ന് മന്ത്രിമാര്‍ പറയും. അവിടെയാണ് നമുക്ക് നിയന്ത്രണം ആവശ്യമായി വരുന്നത്, ഷബാന മഹ്മൂദ് ചൂണ്ടിക്കാണിക്കുന്നു.
