സ്‌കൂളുകളില്‍ കുട്ടികള്‍ക്കെതിരായ ലൈംഗികാതിക്രമങ്ങള്‍; സുരക്ഷ ശക്തമാക്കണമെന്ന് ആവശ്യം
ലണ്ടന്‍: ഇംഗ്ലണ്ടിലെയും വെയില്‍സിലെയും സ്‌കൂളുകളിലും സമീപപ്രദേശങ്ങളിലും കുട്ടികള്‍ക്കെതിരായ ആയിരക്കണക്കിന് ലൈംഗികാതിക്രമ പരാതികള്‍ രേഖപ്പെടുത്തിയതായി പൊലീസ് കണക്കുകള്‍. 2021 മുതല്‍ 2025 വരെ പതിമൂന്ന് വയസ്സില്‍ താഴെയുള്ള കുട്ടികള്‍ക്കെതിരായ കുറഞ്ഞത് 8,500 ലൈംഗിക കുറ്റകൃത്യങ്ങളാണ് റിപ്പോര്‍ട്ട് ചെയ്തത്. പ്രതിദിന ശരാശരി അഞ്ചിനടുത്താണ്. കുട്ടികള്‍ മറ്റു കുട്ടികളെ ലൈംഗികാതിക്രമങ്ങള്‍ക്ക് ഇരയാക്കുന്നതും ഗൗരവമായ ആശങ്കയായി തുടരുന്നു. ഇരകളുടെ ലിംഗവിവരം രേഖപ്പെടുത്തിയ കേസുകളില്‍ പെണ്‍കുട്ടികളാണ് കൂടുതലായി അതിക്രമം നേരിട്ടത്. ലഭ്യമായ കണക്കുകള്‍ പൊലീസില്‍ റിപ്പോര്‍ട്ട് ചെയ്ത പരാതികളുടേതാണ്; എല്ലാം കോടതിയില്‍ കുറ്റം തെളിഞ്ഞ കേസുകളല്ല.
ഇംഗ്ലണ്ടിലെയും വെയില്‍സിലെയും 43 പൊലീസ് സേനകളില്‍ 33 എണ്ണം നല്‍കിയ വിവരങ്ങളാണ് വിശകലനത്തിന് ഉപയോഗിച്ചത്. ചില രേഖകളില്‍ സ്‌കൂളിന് സമീപം നടന്ന സംഭവങ്ങളും ഉള്‍പ്പെട്ടിട്ടുണ്ട്. വിവരങ്ങളിലെ അപൂര്‍ണതയും റിപ്പോര്‍ട്ട് ചെയ്യപ്പെടാത്ത സംഭവങ്ങളും കാരണം പ്രശ്‌നത്തിന്റെ യഥാര്‍ഥ വ്യാപ്തി ഇതിലും കൂടുതലാകാമെന്നാണ് വിലയിരുത്തല്‍.
ക്ലാസ്മുറിയിലെ ബോധവത്കരണംകൊണ്ട് മാത്രം പ്രശ്‌നം പരിഹരിക്കാനാകില്ലെന്നും അതിക്രമം നേരിട്ട കുട്ടികള്‍ക്ക് വിദഗ്ധ പിന്തുണ ഉറപ്പാക്കണമെന്നും ശിശുസംരക്ഷണ പ്രവര്‍ത്തകര്‍ ആവശ്യപ്പെട്ടു. ദോഷകരമായ ലൈംഗിക പെരുമാറ്റം പ്രകടിപ്പിക്കുന്ന കുട്ടികള്‍ക്കും നേരത്തെയുള്ള ഇടപെടലും സഹായവും ലഭ്യമാക്കേണ്ടതുണ്ടെന്ന് വിദഗ്ധര്‍ ചൂണ്ടിക്കാട്ടുന്നു. കുട്ടികളുടെ സുരക്ഷ ഉറപ്പാക്കാന്‍ സ്‌കൂളുകള്‍, രക്ഷിതാക്കള്‍, സര്‍ക്കാര്‍, ശിശുസംരക്ഷണ സംവിധാനങ്ങള്‍ എന്നിവയുടെ ഏകോപിത പ്രവര്‍ത്തനം വേണമെന്ന ആവശ്യവും ശക്തമാണ്.
