കുടുംബങ്ങളുടെ വൈദ്യുതി ബില്‍ കുറയ്ക്കാന്‍ 1 ബില്യണ്‍ പൗണ്ടിലധികം ചെലവഴിക്കുന്ന പദ്ധതിയുമായി ചാന്‍സലര്‍
കുതിച്ചുയരുന്ന വൈദ്യുതി ബില്ലില്‍ ആശങ്ക വര്‍ധിച്ചതോടെ, കുറഞ്ഞ വരുമാനമുള്ള കുടുംബങ്ങള്‍ക്ക് ആശ്വാസം നല്‍കാന്‍ ബജറ്റില്‍ 1 ബില്യണ്‍ പൗണ്ടിലധികം ചെലവഴിക്കുന്ന പദ്ധതിയുമായി ചാന്‍സലര്‍ ജോണ്‍ ഹീലി.
ചില ക്ഷേമപദ്ധതികളുടെ ആനുകൂല്യം ലഭിക്കുന്ന കുടുംബങ്ങള്‍ക്ക് നല്‍കുന്ന വാം ഹോംസ് ഡിസ്‌കൗണ്ട് വര്‍ധിപ്പിക്കാനാണ് പ്രധാനമായും തുക ഉപയോഗിക്കുക. നിലവില്‍ 150 പൗണ്ട് ലഭിക്കുന്ന ഈ ഇളവ് 100 പൗണ്ട് കൂടി വര്‍ധിപ്പിച്ച് 250 പൗണ്ടാക്കുന്ന നിര്‍ദേശമാണ് പരിഗണനയിലുള്ളത്. അധിക തുക നികുതിദായകരുടെ പണത്തില്‍ നിന്നാകും കണ്ടെത്തുക.
അതേസമയം, എല്ലാ ഉപഭോക്താക്കള്‍ക്കും വൈദ്യുതി ബില്‍ കുറയ്ക്കുന്നതിനായി ബില്ലുകളില്‍ ഉള്‍പ്പെടുത്തിയിരിക്കുന്ന വിവിധ ലെവികള്‍ പൂര്‍ണമായും ഒഴിവാക്കണമെന്ന ഊര്‍ജ സെക്രട്ടറി മിയാറ്റ ഫാന്‍ബുള്ളെയുടെ നിര്‍ദേശത്തോട് ഹീലി അനുകൂലിക്കുന്നില്ലെന്നാണ് റിപ്പോര്‍ട്ട്. ഈ നീക്കത്തിലൂടെ ഓരോ ഉപഭോക്താവിനും 120 പൗണ്ട് വരെ ലാഭിക്കാനാകുമെന്നാണ് കണക്കുകൂട്ടല്‍.
ഇറാന്‍ യുദ്ധത്തെ തുടര്‍ന്ന് ജനുവരിയില്‍ ഊര്‍ജ വില പരിധി 442 പൗണ്ട് വരെ ഉയരാന്‍ സാധ്യതയുണ്ടെന്ന പ്രവചനമാണ് സര്‍ക്കാരിന്റെ ആശങ്ക വര്‍ധിപ്പിച്ചത്. ഇത് പ്രധാനമന്ത്രി ആന്‍ഡി ബേണ്‍ഹാം പ്രഖ്യാപിച്ച വൈദ്യുതി ബില്ലിലെ വാറ്റ് ഇളവിന്റെ നേട്ടം പൂര്‍ണമായും ഇല്ലാതാക്കുമെന്നാണ് വിലയിരുത്തല്‍.
ഒക്ടോബര്‍ 28ന് അവതരിപ്പിക്കുന്ന ബജറ്റില്‍ ആഗോള സാമ്പത്തിക പ്രതിസന്ധിയുടെ പശ്ചാത്തലത്തില്‍ സര്‍ക്കാര്‍ ചെലവുകള്‍ നിയന്ത്രിക്കുന്നതില്‍ ശ്രദ്ധ കേന്ദ്രീകരിക്കുമെന്നാണ് ട്രഷറി വൃത്തങ്ങള്‍ വ്യക്തമാക്കുന്നത്. ബോണ്ട് വിപണിയിലെ അനിശ്ചിതത്വവും പൊതു ധനകാര്യത്തില്‍ സമ്മര്‍ദം വര്‍ധിപ്പിക്കുന്നുണ്ട്.
കുടുംബങ്ങള്‍ക്ക് ആശ്വാസം നല്‍കാന്‍ അടിയന്തര ഊര്‍ജ സഹായം പ്രഖ്യാപിക്കണമെന്ന് ലേബര്‍ എംപിമാര്‍ ആവശ്യപ്പെട്ടിരുന്നു.
