ഒരു സ്ത്രീയെ വര്‍ഷങ്ങളോളം ശാരീരികവും ലൈംഗികവും വൈകാരികവുമായ പീഡനങ്ങള്‍ക്ക് ഇരയാക്കിയ കേസില്‍ ഓക്സ്ഫോര്ഡ് സ്വദേശിയായ മലയാളി യുവാവിനെ 17 വര്‍ഷം തടവിന് ശിക്ഷിച്ചു. ഓക്സ്ഫോര്ഡ് ക്രൗണ്‍ കോടതിയാണ് പെര്‍സി സ്ട്രീറ്റ് സ്വദേശിയായ രാജീവ് ഹരികൃഷ്ണന്‍ (33)ന് 17 വര്‍ഷത്തെ തടവുശിക്ഷ വിധിച്ചത്. അഞ്ച് തവണ ബലാത്സംഗം ചെയ്തത്, നിര്‍ബന്ധപൂര്‍വ്വം നിയന്ത്രിക്കാന്‍ ശ്രമിച്ചത്, മനഃപൂര്‍വ്വം ശ്വാസം മുട്ടിച്ചത്, ശാരീരിക പരിക്കേല്‍പ്പിക്കും വിധം ആക്രമിച്ചത്, നീതിനിര്‍വ്വഹണത്തെ തടസ്സപ്പെടുത്താന്‍ ശ്രമിച്ചത് എന്നീ കുറ്റങ്ങളില്‍ കുറ്റക്കാരനാണെന്ന് കണ്ടെത്തി.
നിയന്ത്രണ ഉത്തരവ് (restraining order) ലംഘിച്ചതുമായി ബന്ധപ്പെട്ട മറ്റ് രണ്ട് കുറ്റങ്ങളും ഇയാള്‍ സമ്മതിച്ചു. തേംസ് വാലി പോലീസ് നടത്തിയ അന്വേഷണത്തിനൊടുവില്‍, ഓക്സ്ഫോര്‍ഡില്‍ ബലാത്സംഗക്കുറ്റത്തിന് ശിക്ഷ വിധിച്ചു.
അഞ്ച് തവണ ബലാത്സംഗം ചെയ്ത കുറ്റം, നിര്‍ബന്ധപൂര്‍വ്വം നിയന്ത്രിക്കാന്‍ ശ്രമിച്ചുള്ള പെരുമാറ്റം, ഉദ്ദേശ്യപൂര്‍വ്വം ശ്വാസംമുട്ടിച്ചുള്ള ആക്രമണം, ശാരീരിക പരിക്കേല്‍പ്പിച്ചുള്ള ആക്രമണം, നിയമനടപടികളെ അട്ടിമറിക്കാന്‍ ശ്രമിച്ച കുറ്റം, നിയന്ത്രണ ഉത്തരവ് ലംഘിച്ചതുമായി ബന്ധപ്പെട്ട മറ്റ് രണ്ട് കുറ്റങ്ങള്‍ കൂടി പ്രതി സമ്മതിച്ചു. ഈ കേസിലെ ഇര ദീര്‍ഘകാലത്തോളം ശാരീരികവും ലൈംഗികവും വൈകാരികവുമായ പീഡനങ്ങള്‍ക്ക് വിധേയയായിട്ടുണ്ട്- അന്വേഷണ ഉദ്യോഗസ്ഥയായ ഡിറ്റക്ടീവ് കോണ്‍സ്റ്റബിള്‍ മരിസ ചേംബര്‍ലെയ്ന്‍ പറഞ്ഞു.
"ഈ സംഭവം പോലീസില്‍ അറിയിക്കാനും അന്വേഷണ നടപടികളുമായി സഹകരിക്കാനും വലിയ ധൈര്യവും കരുത്തും കാണിച്ച ഇരയോട് ഞാന്‍ നന്ദി പറയുന്നു. ഈ ശിക്ഷാവിധി സാധ്യമായതില്‍ അവരുടെ അസാമാന്യമായ ധൈര്യത്തിനും അതിജീവനശേഷിക്കും വലിയ പങ്കുണ്ട്.
കോടതി വിധിച്ച ശിക്ഷ കുറ്റകൃത്യങ്ങളുടെ ഗൗരവം വ്യക്തമാക്കുന്നു; ലൈംഗിക കുറ്റകൃത്യങ്ങളെക്കുറിച്ചുള്ള പരാതികള്‍ തേംസ് വാലി പോലീസ് എപ്പോഴും ഗൗരവമായി കാണുമെന്നും കുറ്റവാളികളെ നിയമത്തിന് മുന്നില്‍ കൊണ്ടുവരാന്‍ അക്ഷീണം പരിശ്രമിക്കുമെന്നും ഇത് തെളിയിക്കുന്നു.
ഗാര്‍ഹിക പീഡനം ഒരുകാരണവശാലും അനുവദിക്കില്ല. ഇരകള്‍ക്ക് പിന്തുണ നല്‍കുന്നതിനും കുറ്റവാളികളെ നിയമത്തിന് മുന്നില്‍ കൊണ്ടുവരുന്നതിനും കൂടുതല്‍ ദോഷങ്ങള്‍ തടയുന്നതിനും ഞങ്ങള്‍ പ്രതിജ്ഞാബദ്ധരാണ്."-
മരിസ ചേംബര്‍ലെയ്ന്‍ വ്യക്തമാക്കി.
