തിരുവനന്തപുരം: സംസ്ഥാനത്ത് മന്ത്രിമാര്‍, പ്രതിപക്ഷ നേതാവ്, ചീഫ് വിപ്പ്, എംഎല്‍എമാര്‍ എന്നിവരുടെ ശമ്പളവും വിവിധ അലവന്‍സുകളും വര്‍ധിപ്പിച്ചു. ഇതുസംബന്ധിച്ച ബില്‍ മന്ത്രിസഭ പാസ്സാക്കി. മുന്‍ എംഎല്‍എമാരുടെ പെന്‍ഷനും വര്‍ധിപ്പിച്ചിട്ടുണ്ട്.
മന്ത്രിമാര്‍, പ്രതിപക്ഷ നേതാവ്, ചീഫ് വിപ്പ് എന്നിവരുടെ പ്രതിമാസ ആകെ ശമ്പളവും അലവന്‍സുകളും നിലവിലെ 1,08,000 രൂപയില്‍നിന്ന് 1,22,000 രൂപയായാണ് ഉയര്‍ത്തുന്നത്. എംഎല്‍എമാരുടെ പ്രതിമാസ ശമ്പളവും അലവന്‍സുകളും ഉള്‍പ്പെടെയുള്ള തുക 70,000 രൂപയില്‍നിന്ന് 98,000 രൂപയാകും. ഇതോടൊപ്പം മുന്‍ എംഎല്‍എമാരുടെ പെന്‍ഷനും വര്‍ധിപ്പിക്കും.
എംഎല്‍എമാരുടെയും മന്ത്രിമാരുടെയും ശമ്പളം വര്‍ധിപ്പിച്ചതിന് പിന്നാലെ തദ്ദേശസ്ഥാപനങ്ങളിലെ ജനപ്രതിനിധികള്‍ക്കും ഓണറേറിയം വര്‍ധിപ്പിക്കാന്‍ സര്‍ക്കാര്‍ നീക്കം. പുതുക്കിയ നിരക്കിലുള്ള ഓണറേറിയം അടുത്ത വര്‍ഷം ജനുവരി ഒന്നു മുതല്‍ നല്‍കാനാണ് ആലോചന. ഓണറേറിയം വര്‍ധന പഠിക്കാന്‍ കഴിഞ്ഞ ജൂലൈയില്‍ സമിതിയെ നിയോഗിച്ചിരുന്നതായി തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി നിയമസഭയില്‍ വ്യക്തമാക്കിയിരുന്നു.
സമിതിയുടെ ശുപാര്‍ശകള്‍ ഉള്‍പ്പെടെ പരിശോധിച്ചായിരിക്കും വര്‍ധന സംബന്ധിച്ച അന്തിമ തീരുമാനമെടുക്കുകയെന്ന് മന്ത്രി നിയമസഭയിലെ സബ്മിഷന് മറുപടിയായി പറഞ്ഞു. നിലവില്‍ തദ്ദേശസ്ഥാപന അംഗങ്ങള്‍ക്ക് ലഭിക്കുന്ന ഓണറേറിയം അപര്യാപ്തമാണെന്നും അദ്ദേഹം ചൂണ്ടിക്കാട്ടി. ഓണറേറിയം വര്‍ധിപ്പിക്കണമെന്ന ആവശ്യം പരിഗണിക്കുന്നതിന്റെ ഭാഗമായാണ് സമിതിയെ നിയോഗിച്ചത്.
2018ലാണ് ശമ്പളവും അലവന്‍സുകളും അവസാനമായി പരിഷ്കരിച്ചതെന്ന് സ്പീക്കര്‍ തിരുവഞ്ചൂര്‍ രാധാകൃഷ്ണന്‍ പറഞ്ഞു. എംഎല്‍എമാരുടെ ശമ്പളവര്‍ധന നടപ്പാക്കിയതില്‍ സര്‍ക്കാരിനെ അഭിനന്ദിച്ച സ്പീക്കര്‍, അംഗങ്ങള്‍ക്ക് ഒരു പേഴ്സണല്‍ അസിസ്റ്റന്റിനെ കൂടി അനുവദിക്കണമെന്നും ആവശ്യപ്പെട്ടു. ഇക്കാര്യം പരിഗണിക്കാമെന്ന് മുഖ്യമന്ത്രി മറുപടി നല്‍കി. നടപടികള്‍ പൂര്‍ത്തിയാക്കി നിയമസഭ അനിശ്ചിതകാലത്തേക്ക് പിരിഞ്ഞു.
