നവംബര് ഒന്നിന്, കാലിഫോര്ണിയയില് സോഫ്റ്റുവെയര് എഞ്ചിനീയറായ കോഴിക്കോട് സ്വദേശി അഖില് ജയരാജുമായുള്ള വിവാഹത്തിന് തയാറെടുക്കുകയാണ് സംവൃതാ സുനില്. വെള്ളിത്തിരയിലെ തന്റെ അവസാന സീന് പൂര്ത്തിയാക്കി സംവൃത സിനിമയോട് വിടപറഞ്ഞു കഴിഞ്ഞു. വിവാഹ ശേഷം അഭിനയിക്കില്ലെന്ന് നടി നേരത്തെ വ്യക്തമാക്കിയിരുന്നു. വിവാഹത്തിനു മുന്നോടിയായി പുതിയ പ്രോജക്ടുകള് സംവൃത ഒഴിവാക്കിയിരുന്നു.
വിവാഹത്തിന് ശേഷം അമേരിക്കയിലേക്ക് പറക്കാന് ഒരുങ്ങുന്ന സംവൃതയ്ക്ക് കുറെ കൊച്ചു മോഹങ്ങളുണ്ട്. "അമേരിക്കയില് എനിക്ക് ഒരു സാധാരണക്കാരിയായി ജീവിക്കണം. ആരാലും തിരിച്ചറിയപ്പെടാതെ ഒരു വെറും പെണ്ണായി ജീവിക്കണം. തെരുവില് ഒറ്റയ്ക്ക് നടക്കണം. മാര്ക്കറ്റില് പോകണം. അങ്ങനെയൊരു ജീവിതം നഷ്ടപ്പെട്ടിട്ട് കുറേക്കാലമായി. ആ സുഖമൊന്ന് അനുഭവിക്കണം"- ഒരു സിനിമാ വാരികയ്ക്ക് അനുവദിച്ച അഭിമുഖത്തില് സംവൃത വ്യക്തമാക്കി.
അമേരിക്കയില് നിന്ന് ഇടയ്ക്കിടെ വന്ന് സിനിമ ചെയ്യാന് തനിക്കു പദ്ധതി യില്ലെന്നും നടി പറയുന്നു. "മംമ്ത മോഹന്ദാസ് ബഹ്റൈനില് നിന്ന് ഇന്ത്യയിലേക്ക് അഭിനയിക്കാന് പറക്കുന്നത് കാണുമ്പോള് തന്നെ എനിക്ക് അതിശയമാണ്. അതുപോലെ യുഎസില് നിന്ന് ഇന്ത്യയിലേക്ക് പതിവായി വന്നുപോകുന്നത് ചിന്തിക്കാന് പോലും വയ്യ. അതിനാല് ഞാന് തല്ക്കാലം വീട്ടമ്മയായി ഒതുങ്ങും"- സംവൃത പറയുന്നു.
സംവൃത അവസാനമായി അഭിനയിച്ചത് ലാല് ജോസിന്റെ 'അയാളും ഞാനും തമ്മില്' എന്ന ചിത്രത്തിനായാണ്. ചിത്രത്തിന്റെ ചിത്രീകരണം മൂന്നാറില് അവസാനിച്ചതോടെ സംവൃതയുടെ അഭിനയ ജീവിതത്തിനു വിരാമമായി. ലാല് ജോസ് സംവിധാനം ചെയ്ത 'രസികന്' ആയിരുന്നു സംവൃതയുടെ ആദ്യ ചിത്രം. സംവൃതയുടെ വെള്ളിത്തിരയിലെ അഭിനയ ജീവിതത്തിന്റെ തുടക്കവും ഒടുക്കവും അങ്ങനെ ലാല് ജോസ് ചിത്രത്തിലൂടെയായി. അഭിനയ ജീവിതത്തിന്റെ തുടക്കവും അവസാനവും ഒരേ സംവിധായകന്റെ ചിത്രത്തിലാകുന്ന യാദൃശ്ചികതയാണ് സംവൃതയുടെ ജീവിതത്തില് സംഭവിച്ചിരിക്കുന്നത്.
ഈ വര്ഷം മല്ലുസിംഗ്, ഡയമണ്ട് നെക്ലയിസ് എന്നീ രണ്ടു സൂപ്പര്ഹിറ്റുകള് സംവൃതയ്ക്ക് ലഭിച്ചു. അസുരവിത്ത്, കിംഗ് ആന്റ് ദി കമ്മീഷണര്, ഗ്രാമം, അരികെ, എന്നീ ചിത്രങ്ങളും 2012 ല് പുറത്തുവന്നു. 25 കാരിയായ സംവൃത പടിയിറങ്ങുന്നതോടെ മലയാളിത്തം ഉള്ള ഒരു നായികയെക്കൂടി പ്രേക്ഷകര്ക്ക് നഷ്ടമാവുകയാണ്.
കാലിഫോര്ണിയ വോള്ട്ട് ഡിസ്നി കമ്പനിയില് എഞ്ചിനീയറാണ് സംവൃതയുടെ പ്രതിശ്രുത വരന് അഖില്. സംവൃതയുടെ വിവാഹം ഉറപ്പിച്ചത് കഴിഞ്ഞ ജനുവരിയിലായിരുന്നു.പിന്നീട് കോഴിക്കോട്ടെ ആര്യസമാജ ത്തില് വിവാഹം രജിസ്റ്റര് ചെയ്തു. വിവാഹശേഷം അഖിലിനൊപ്പം കാലിഫോര്ണിയയിലേക്ക് പറക്കാനുള്ള സര്ട്ടിഫിക്കറ്റുകള് ശരിയാക്കാന് വേണ്ടിയായിരുന്നു ആര്യസമാജത്തിലെ വിവാഹം. എന്നാല് സംവൃത രഹസ്യമായി വിവാഹിതയായി എന്ന വാര്ത്ത വിവാദമായി. വിവാഹം നവംബര് ഒന്നിന് നടക്കും എന്ന് വീട്ടുകാര് അറിയിച്ചതോടെയാണ് വിവാദം അവസാനിച്ചത്.
