കോട്ടയം : പാലാ ഉപതെരഞ്ഞെടുപ്പിലെ പരാജയം കേരളാ കോണ്സ്രിന്റെ മുഖത്തേറ്റ അടിയായി. പാലാ ആരൊക്കെ ശ്രമിച്ചാലും കൈവിട്ടുപോകില്ലെന്ന അമിത ആത്മവിശ്വാസം തന്നെയാണ് പരാജയത്തിന് അപ്പുറത്തേയ്ക്കുള്ള നാണക്കേടിന് കാരണമായിരിക്കുന്നത്.
ജോസ് ടോം പുലിക്കുന്നേല് പരാജയപ്പെടുമെന്ന് സ്വപ്നത്തില് പോലും കാണാതിരുന്ന കേരളാ കോണ്ഗ്രസ് ജോസ് ടോം പുലിക്കുന്നേലിന് വിജയാശംസകള് നേര്ന്ന് ഫ്ളക്സുകള് തയ്യാറാക്കുകയും വിജയം പങ്കുവെക്കാന് ലഡ്ഡുവുമൊക്കെ തയ്യാറാക്കിയിരുന്നു.
'വമ്പിച്ച ഭൂരിപക്ഷത്തോടെ വിജയിപ്പിച്ച വോട്ടര്മാര്ക്ക് നന്ദി... നന്ദി... നന്ദി...' എന്ന വാചകത്തോടെയായിരുന്നു ഫ്ളക്സ്. 'മനസില് മായാതെ എന്നും ജനഹൃദയങ്ങളില് ജീവിക്കുന്ന കെ.എം മാണി സാറിന്റെ പിന്ഗാമി നിയുക്ത പാലാ എംഎല്എ അഡ്വ.ജോസ് ടോമിന് അഭിനന്ദനങ്ങള്' എന്നും ഫ്ളക്സിലുണ്ട്. കൂടാതെ മണ്ഡലത്തിലെ പല പരിപാടികളിലും തയാറാക്കിയ നോട്ടീസിലും എംഎല്എ അഡ്വ.ജോസ് ടോം എന്നായിരുന്നു.
കേരള സെക്യൂരിറ്റി സ്റ്റാഫ് യൂണിയന് സംസ്ഥാന ക്യാംപിന്റെ ഉദ്ഘാടനവുമായി ബന്ധപ്പെട്ട് നല്കിയ പരസ്യത്തില് ജോസ് ടോമിനെ എം.എല്.എ എന്നാണ് വിശേഷിപ്പിച്ചിരിക്കുന്നത്.
നേരത്തെ പാലായിലെ യു.ഡി.എഫ് ക്യാമ്പില് ജോസ് ടോമിനെ വിജയിപ്പിച്ച ജനങ്ങള്ക്കുള്ള ലഡുവും പടക്കങ്ങളും റെഡിയാണല്ലോ, നിങ്ങളുടെതോ എന്ന മാധ്യമ പ്രവര്ത്തകന്റെ ചോദ്യത്തിന് യു.ഡി.എഫ് വാങ്ങിവെച്ച പടക്കങ്ങളും ലഡുവും ഇനി പകുതി വിലക്ക് കിട്ടുമല്ലോ എന്നായിരുന്നു മാണി സി കാപ്പന്റെ പ്രതികരണം.
