കേരള നിയമസഭയിലെ അവിവാഹിതരുടെ എണ്ണം മൂന്നില് നിന്ന് രണ്ടാകുന്നു. റോജി എം. ജോണിനെയും കോവൂര് കുഞ്ഞുമോനെയും 'സമ്മര്ദ്ദത്തിലാഴ്ത്തി' മൂവാറ്റുപുഴ എം.എല്.എ എല്ദോ എബ്രഹാം വിവാഹിതനാവുകയാണ്. ജനുവരി 12ന് രാവിലെ 11ന് മൂവാറ്റുപുഴ കുന്നക്കുരുടി സെന്റ് ജോര്ജ് യാക്കോബായ പള്ളിയിലാണ് വിവാഹം. കഴിഞ്ഞ ഞായറാഴ്ചയായിരുന്നു വിവാഹ നിശ്ചയം. വധു ആയുര്വേദ കണ്ണു ഡോക്ടര് ആയ ആഗി മേരി. സ്വന്തം മണ്ഡലത്തിലെ വോട്ടര് തന്നെ.
കഴിഞ്ഞ ജനുവരിയില് കല്ലൂര്ക്കാട്ടെ ആഗിയുടെ ക്ലിനിക് ഉദ്ഘാടനം ചെയ്യാന് പോയതാണ് എല്ദോ. ഡോക്ടറെ കണ്ടമാത്രയില് ഇഷ്ടപ്പെട്ടു. പ്രണയത്തിനൊന്നും നിന്നില്ലെന്ന് എല്ദോ പറയുന്നു. യാക്കോബായക്കാരനായ എല്ദോ റോമന് കത്തോലിക്കാ വിഭാഗക്കാരായ പെണ്വീട്ടുകാരോട് കാര്യം പറഞ്ഞു. കല്യാണം നിശ്ചയിച്ചു.
മണ്ണാംപറമ്പില് അഗസ്റ്റിന്റെയും മേരിയുടെ ഏകമകളാണ് 29 കാരിയായ ആഗി. പാരമ്പര്യമായി ആയുര്വേദ നേത്രരോഗ ചികിത്സകരാണ് ആഗിയുടെ കുടുംബം. വാഴക്കുളത്തെ സ്വന്തം ആയുര്വേദ ക്ലിനിക്കും കല്ലൂര്ക്കാട് തുടങ്ങിയ ചെറിയ ആശുപത്രിയും ആഗി ഭംഗിയായി നടത്തിവരികയാണെന്ന് ബി.എക്കാരനായ എല്ദോ പറയുന്നു.
തൃക്കളത്തൂര് മേപ്പുറത്ത് അബ്രഹാമിന്റെ ഏലിയാമ്മയുടെയും മകനാണ് 42കാരനായ എല്ദോ. രണ്ടു ചേച്ചിമാരുടെയും വിവാഹം കഴിഞ്ഞു. എല്ദോയെ കല്യാണം കഴിപ്പിക്കാനുള്ള ഇവരുടെ ശ്രമം ഇതുവരെ ഫലിച്ചിരുന്നില്ല. എല്ദോയുടെ തിരക്കുകള്ക്കിടയിലും വിവാഹ ഒരുക്കങ്ങളൊക്കെ നടക്കുന്നുണ്ട്. ചെറിയവീട് ചെറുതായി പുതുക്കിപ്പണിതു. മരത്തിന്റെ മേല്ക്കൂര ഇരുമ്പാക്കി മാറ്റി ഓട് വീണ്ടും മേഞ്ഞു.
കമ്മ്യൂണിസ്റ്റുകാരന് യോജിച്ച രീതിയിലാകും വിവാഹം. പള്ളിയിലെ ചടങ്ങിനുശേഷം മൂവാറ്റുപുഴയില് സൗകര്യപ്രദമായി എത്താനാകുന്ന വേദിയില് വൈകിട്ട് ചായസത്കാരം ഉണ്ടാകും. മറക്കാനാവാത്ത ആയിരക്കണക്കിന് പേരുകളുണ്ട്. കഷ്ടപ്പാടിന്റെ വഴികളില് ഒപ്പം നടന്നവര് , കൈപിടിച്ച് കയറ്റിയവര് , കണ്ണുനീര് തുടച്ചവര്... ജീവിതത്തിലെ സുപ്രധാന ദിനത്തില് അവരുടെയൊക്കെ സാന്നിദ്ധ്യം തനിക്ക് വിലപ്പെട്ടതാണ് എന്ന് എല്ദോ പറയുന്നു.
