മാള: അന്നമനട എടയാറ്റൂരില് മട്ടയ്ക്കല് ജോസ് മക്കളിലൂടെ അപൂര്വമായ ഒരു നേട്ടത്തിലേക്ക് അടുക്കുകയാണ്. ഡോക്ടര്മാരാകുന്ന ആറ് പെണ്മക്കള്ക്കായി ഒരു ആശുപത്രി പണിയണമെന്ന അദ്ദേഹത്തിന്റെ സ്വപ്നം യാഥാര്ഥ്യമാവാനായുള്ള വഴി തെളിയുകയാണ്. ജോസിന്റെ മൂന്ന് പെണ്മക്കള് എം.ബി.ബി.എസ് ബിരുദമെടുത്തതും, മൂന്നു പേര് പഠനം തുടരുന്നതും ചൈനയിലാണ്! മക്കളെ പഠിപ്പിച്ച വകയില് ഒരു കോടിയോളം രൂപ കടമായെങ്കിലും, ഫര്ണിച്ചര് ബിസിനസുകാരനായ ജോസിനും ഭാര്യ ബേബിക്കും മക്കള്ക്ക് നല്ല വിദ്യാഭ്യാസം നല്കാനായല്ലോ എന്ന ചാരിതാര്ത്ഥ്യം ആണുള്ളത്.
ആറു സഹോദരിമാരില് മൂത്തയാളായ എസ്തര് ആണ് എം.ബി.ബി.എസ് പഠനത്തിന് ചൈനയിലെ ചോംചിംഗ് സര്വകലാശാലയിലേക്ക് ആദ്യം പോയത്. രണ്ടാമത്തെ മകള് യൂദിത്തും അനുജത്തി റൂത്തും ചോംചിംഗില് നിന്നു തന്നെ എം.ബി.ബി.എസ് ബിരുദമെടുത്തു. ഇവര്ക്കു താഴെ റാഹേലും റബേക്കയും സാറയും അവിടെത്തന്നെ പഠനം തുടരുന്നു. മക്കളിലെ ഏക ആണ്തരിയായ ജെനു ആന്റണി ദുബായില് മര്ച്ചന്റ് നേവിയില് സെക്കന്ഡ് ഓഫീസര് .
വീട്ടിലേക്ക് ആദ്യം ചൈനീസ് ബിരുദം കൊണ്ടുവന്ന ഡോ. എസ്തറിന് ഇപ്പോള് 30 വയസ്. ഡോ. യൂദിത്ത് ഡല്ഹി എയിംസിലും ഡോ. റൂത്ത് നിലമ്പൂരിലെ സ്വകാര്യ ക്ളിനിക്കിലും ജോലി ചെയ്യുന്നു. മറ്റ് മൂന്നു പേര് കൂടി പഠനം പൂര്ത്തിയാക്കി വരുമ്പോള് എല്ലാവരെയും ചേര്ത്ത് ആശുപത്രി തുടങ്ങണം- അതാണ് പത്താം ക്ളാസ് വിദ്യാഭ്യാസം മാത്രമുള്ള ജോസിന്റെയും എല്.ഐ.സി ഏജന്റ് ആയ ബേബിയുടെയും ആഗ്രഹം.
32 വര്ഷം മുമ്പ് വിവാഹിതനാകുമ്പോള് ഫര്ണിച്ചര് പണിക്കാരനായിരുന്നു ജോസ്. പിന്നീട് സ്വന്തം ഫര്ണിച്ചര് ബിസിനസ് ആയി. വിദ്യാഭ്യാസ വായ്പ ഉള്പ്പെടെ ഒരു കോടിയുടെ കടമുണ്ടെങ്കിലും ആറു മക്കളെ ഡോക്ടറാക്കാനും മകനെ വിദേശത്ത് ജോലിക്കാരനാക്കാനും കഴിഞ്ഞതിന്റെ അഭിമാനമുണ്ട്, ജോസിനും ബേബിക്കും. ഇനി, മക്കളുടെ സ്വന്തം ആശുപത്രിയാണ് ലക്ഷ്യം.
(കടപ്പാട് -കേരളാ കൗമുദി)
